विद्युतीय गाडी आयात गर्ने कम्पनीले कम्तिमा ५ वटा चार्जिङ स्टेसन निर्माण गर्नुपर्ने

काठमाडौं– यातायात व्यवस्था विभागले सवारी साधन आयात, उत्पादन तथा जडानसम्बन्धी निर्देशिका बनाएर आयातमा कडाइ र व्यवस्थित गर्न लागेको छ । जसका लागि विभागले मापदण्डको मस्यौदा समेत तयार पारिसकेको छ ।

सवारी आयातकर्ताहरूले निश्चित वर्षसम्म सर्भिस दिनुपर्ने, वर्कशप बनाउनु पर्ने, विद्युतीय सवारी बिक्री गरेपछि संख्याका आधारमा चार्जिङ स्टेसन राख्नुपर्ने लगायत बाध्यकारी व्यवस्था लागु गर्ने प्रस्ताव गरिएको छ ।

विद्युतीय सवारी साधन आयात गर्नेले कम्तिमा ५ वटा चार्जिङ स्टेसन बनाउनुपर्ने भएको छ । वार्षिक ५०० युनिट ईभी आयात गर्नेले ५ वटा चार्जिङ स्टेसन, ३ वटा सर्भिस सेन्टर (४०० वर्गमिटर), १ जना इन्जिनियरसहित ५ जना प्राविधिकको व्यवस्था गर्नुपर्नेछ ।

त्यसैगरी, १ हजार युनिट ईभी आयात गर्नेले १० वटा चार्जिङ स्टेसन, ५ वटा सर्भिस सेन्टर, १० जना प्राविधिक, ५ हजार युनिटसम्म आयात गर्नेले २० वटा चार्जिङ स्टेसन, एउटा ब्याट्री व्यवस्थापन केन्द्र, १० वटा सर्भिस सेन्टर, ३ इन्जिनियरसहित १५ प्राविधिक राख्नुपर्ने उल्लेख गरिएको छ ।

५ हजार युनिट बढी आयात गर्नेले ५० वटा चार्जिङ स्टेसन, एउटा ब्याट्री व्यवस्थापन केन्द्र, १५ वटा सर्भिस सेन्टर र ४ जना इन्जिनियरसहित २० जना प्राविधिक कर्मचारी राख्नुपर्नेछ ।