ललितपुरमा ईभी प्रयोगकर्ताले सम्पत्ति करमा ५ प्रतिशत छुट पाउने

काठमाडौँ - ललितपुर महानगरपालिकाले आफ्‌नो पालिका भित्र विद्युतीय सवारी साधन (ईभी) प्रयोग गर्नेलाई सम्पत्ति करमा ५ प्रतिशत छुट दिने भएको छ ।

महानगरकी उपप्रमुख मञ्जली शाक्यले मंगलबार आगामी आर्थिक वर्ष २०८२/०८३को बजेट  प्रस्तुत गर्दै कर छुटको प्रस्ताव  सुनाएकी हुन् ।  

बजेटमा भनिएको छ ‘विद्युतीय सवारी साधन प्रयोग गर्ने ललितपुरबासीले सम्पत्ति कर छुट मागेमा ५ प्रतिशत छुट दिइनेछ ।’

आगामी आर्थिक वर्षका लागि उनले सात अर्ब ४६ करोड ८३ लाख ९२ हजार रुपैयाँको बजेट प्रस्तुत गरेकी छन् । यसमध्ये २९ प्रतिशत प्रशासनिक र ६१ प्रतिशत पूँजीगत खर्चमा विनियोजन गरिएको छ ।

यो निर्णयले वातावरणमैत्री सवारीलाई प्रोत्साहन गर्ने अपेक्षा गरिएको छ।