गर्मीमा कारलाई अत्यधिक तातो हुनबाट बचाउन ध्यान दिनुहोस् यी ५ महत्त्वपूर्ण कुरा

चर्को गर्मीले कारको इन्जिनलाई क्षति पुर्‍याउन सक्छ। त्यसैले कारमा हुने कुलिङ सिस्टमले एकदमै महत्त्वपूर्ण भूमिका निभाउँछ, जसले इन्जिलाई अत्यधिक तापबाट जोगाउँछ । तर, यदि यस प्रणालीका केही मुख्य भागमा समस्या आयो भने कार क्षतिग्रस्त हुन सक्छ वा सडकमा नै रोकिन पनि सक्छ।

थर्मोस्टेट : यो यन्त्रले कुलेन्टको प्रवाह नियन्त्रण गर्छ, जसले इन्जिनको तापक्रम स्थिर राख्न मद्दत गर्छ। यदि थर्मोस्टेट बिग्रियो भने, कुलेन्ट प्रवाह बग्न पाउँदैन र इन्जिन चाँडै तात्न थाल्छ। तापक्रम गेजमा अनियमित रिडिङ देखिएमा तुरुन्तै प्राविधिक निरीक्षण आवश्यक हुन्छ।

पानी पम्प : यसले इन्जिन र रेडिएटरबीच कुलेटलाई निरन्तर घुमाइरहन्छ। यदि वाटर पम्पमा चुहावट, आवाज वा खराबी देखिएमा, यो इन्जिन तातिनको प्रमुख कारण बन्न सक्छ।

कुलेन्ट चुहावट : यदि कुलेन्टको मात्रा कम भयो वा प्रणालीमा चुहावट भयो भने ताप व्यवस्थापन प्रणाली कमजोर हुन्छ। ग्यास्केट, नली र रेडिएटरजस्ता भागमा चुहावटको नियमित परीक्षण गर्नुपर्छ।

रेडिएटर फ्यान : गर्मी कम गर्न रेडिएटर फ्यानले महत्त्वपूर्ण भूमिका खेलेको हुन्छ । यदि यो फ्यान काम गरिरहेको छैन भने, इन्जिन छिट्टै तात्न सक्छ। फ्यानको आवाज नआएमा वा काम नगरेको देखिएमा तुरुन्त मर्मत गर्नु उपयुक्त हुन्छ।

रेडिएटर अवरोध : फोहोर, खिया वा धुलोका कारण रेडिएटर बन्द हुने सम्भावना हुन्छ। यस्तो अवरोधले हावाको प्रवाहलाई रोक्छ र कुलेन्ट प्रक्रियामा बाधा पुर्‍याउँछ। रेडिएटर सफा गर्नु अत्यावश्यक छ, विशेषगरी गर्मी महिनामा।

चर्को तापक्रमको मौसममा, कारको नियमित मर्मत–सम्भारले इन्जिनलाई लामो समयसम्म सुरक्षित राख्न मद्दत गर्छ ।