एथर रिज्टाको बिक्री १ लाख युनिट नाघ्यो, नेपालमा प्रतीक्षा गरिँदै

एथरको सबैभन्दा सस्तो स्कुटर रिज्टा १ वर्षमा १ लाख युनिट बिक्री भएको छ । गत वर्षको अप्रिलमा लन्च भएको रिज्टाको होलसेल बिक्री मे २०२५ सम्म आईपुग्दा १ लाख युनिट पुगेको कम्पनीले जनाएको छ ।

मिडिया रिपोर्टका अनुसार, एथर इनर्जीले जुलाई २०२४ देखि अप्रिल २०२५ सम्ममा ९९ हजार ६९१ युनिट रिज्टा बिक्री गरेको थियो । बाँकी ३०९ युनिट पठाइएपछि मे २०२५ मा यो माइलस्टोन हासिल गरिएको हो ।

एथर रिज्टा गत वर्षको अप्रिलमा लन्च गरिएको थियो । आर्थिक वर्ष २०२५ को अन्तिम ९ महिनामा ईभी निर्माताले यसको ८९ हजार ६३९ युनिट बिक्री गर्दै एथरको कुल बिक्रिमा ५८ प्रतिशत योगदान दिएको थियो । यो ४५०एक्स, ४५०एस र ४५० एपेक्स पछि एथरको लाइनअपमा सबैभन्दा धेरै बिक्री हुने मोडेल समेत हो ।

रिज्टा ४५० ले भारतमा एक उपयुक्त पारिवारिक बिद्युतिय स्कुटरको पहिचान कायम गरेको छ । स्कूटरमा फ्ल्याट सिट र ३४ लिटर अन्डर सिट स्टोरेज क्षमता छ । रिज्टामा एथरले २.९ र ३.७ किलोवाट आवर क्षमताको ब्याट्री प्याक उपलब्ध गराएको छ । जसले क्रमशः १०५ र १२७ किलोमिटर रेन्ज दिने दाबी गरिएको छ ।

रिज्टा नेपाली बजारमा समेत प्रतीक्षा गरिँदै आएको विद्युतीय स्कुटर हो । एथरको नेपालका लागि आधिकारिक वितरक वैद्य इनर्जीले यस नयाँ स्कुटरको बिक्री छिट्टै थाल्ने तयारी गरेको छ ।