ड्यासक्याम भएको होन्डाको पहिलो इलेक्ट्रिक बाइक लन्च

होन्डाले आफ्नो पहिलो इलेक्ट्रिक मोटरसाइकल ई-भीओ चीनमा लन्च गरेको छ। सो बाइक होन्डाले वुयाङ-होन्डासँगको सहकार्यमा विकास गरेको हो। रेट्रो क्याफे रेसर डिजाइन र अत्याधुनिक प्रविधिको संयोजनमा आएको ई-भीओ हालका लागि केवल चिनियाँ बजारमा उपलब्ध हुनेछ।

सो बाइक  ४.१ किलोवाट ड्युअल-ब्याट्री र ६.२ किलोवाट ट्रिपल-ब्याट्री गरी दुई भेरिएन्टमा उपलब्ध छ । सानो ब्याट्रीले १२० किलोमिटर र ठूलो ब्याट्रीले १७० किलोमिटरको रेन्ज दिने दाबी गरिएको छ। दुबैमा १५.८ किलोवाटको मोटर जडान गरिएको छ, जसको अधिकतम गति १२० किलोमिटर प्रतिघण्टा छ । यसको सानो ब्याट्रीलाई १ देखि १.५ घण्टा र ठूलो ब्याट्रीलाई १.५ देखि २.५ घण्टामा फुल चार्ज गर्न सकिनेछ।

ई-भीओमा पूर्ण आल्मुनियम फ्रेम, ड्युअल-च्यानल एबीएस र ७६५ एमएम सिट हाइट रहेको छ । बाइकको अगाडि १६ इन्च र पछाडि १४ इन्चका पाङ्ग्रामा सेमी-स्लिक टायर जडान गरिएको छ।

ई-भीओले टेक्नोलोजीको क्षेत्रमा पनि नयाँ उचाइ छोएको छ। यो विश्वकै पहिलो इलेक्ट्रिक मोटरसाइकल हो जसमा इन्टिग्रेटेड ड्यासक्याम छ। ४.१ किलोवाट मोडलमा अगाडि क्यामेरा र ६.२ किलोवाटमा अगाडि र पछाडि दुवैमा क्यामेरा जडान गरिएको छ । बाइकमा दुईवटा ७ इन्चको टीएफटी डिस्प्ले छ, जसमा इन्स्ट्रयुमेन्ट क्लस्टर, नेभिगेसन, म्युजिक, टीपीएमएस र ब्याट्री अवस्थाजस्ता सूचना देखिन्छ। साथै, इको, नर्मल र स्पोर्ट गरी तीनवटा राइडिङ मोड छ।