कर बढ्ने चर्चा बिच ईभीले भरियो चोभार सुक्खा बन्दरगाह

काठमाडाैं । विद्युतीय सवारीसाधन (ईभी) को आयात अत्यधिक बढेका कारण चोभारस्थित सुक्खा बन्दरगाह ईभीले भरिएका छन् । सरकारले ईभीमाथि कर बढाउने तयारी गरेसँगै बजेटअगावै ठूलो संख्यामा भित्र्याइएका हुन् । सरकारले आउँदो जेठ १५ मा ल्याउने आर्थिक विधेयकबाट भन्सार बढाउने तयारी गरिरहेको चर्चा चलेको छ ।

आगामी आर्थिक वर्षको बजेटमा कर वृद्धि हुने हल्ला र चर्चा सुरू भएको ४ महिना भइसक्यो । मिडियामा पनि ईभीमा कर बढ्ने विषयले खुबै चर्चा पाइरहेको छ ।

बजेट आउने समय नजिकिँदै गर्दा सवारी बिक्रेताहरूले ईभी आयात ह्वात्तै बढाएका हुन् । बजेटमा कर बढेमा अहिले बेचिरहेका गाडीको मूल्य बढ्ने भएकाले व्यापारीले बजेट अगावै आफ्नो क्षमताले भ्याए जति गाडी ल्याएर स्टक राख्न थालेका हुन् ।

आगामी आर्थिक वर्ष २०८२–८३ को बजेटले मूल्य बढाउँछ भन्ने अनुमानसहित व्यापारीहरू धमाधम गाडी आयातमा केन्द्रित देखिन्छन् । 

यति बेला बजेटको अघोषित संकेतले ईभी बजार तातेको छ । विशेषतः वैशाख लागेपछि चीनबाट आयात हुने ईभीको चाप भन्सार नाकामा झनै बढेको छ । तातोपानी, रसुवागढी जस्ता प्रमुख भन्सार यार्ड चिनियाँ गाडीले भरिएका छन् ।

सरकारले ईभीलाई प्रोत्साहन नीति अघि सारिने भन्दै आएको छ । तर, स्रोत बढाउने चक्करमा यसपालि भने बजेट मार्फत कर बढाउने हल्ला फैलिएको छ । यस्तै चर्चा चलिरहेका बेला व्यवसायीहरू भने बजेट अघि नै गाडी आयात गरी लाभ लिने होडमा छन् । यद्यपि, कर बढ्ने हल्लाले भन्दा पनि बजार माग अनुसार नै ईभी आयात बढेको हुन सक्ने कतिपयको बुझाई छ । कर थप्ने संकेतसँगै व्यवसायीहरू गाडी आयातमा बढाउनै केन्द्रित छन् ।