ट्रायम्फ नेपालले सम्पन्न ग-यो एपिक राइड, ४० राइडर पुगे लो–मान्थाङ ।

काठमाडौं —ट्रायम्फकाे नेपालका लागि आधिकारिक वितरक, हंसराज हुलासचन्द एन्ड कम्पनी प्रालिले “एपिक राइडः इकोज अफ दि लस्ट किङ्डम” सफलतापूर्वक सम्पन्न गरेको छ । अप्रिल २० देखि २७, २०२५ सम्म आयोजित आठ दिने यो रोमान्चक यात्रामा ४० जना ट्रायम्फ राइडरहरू सहभागी थिए ।

१ हजार किलोमिटरभन्दा बढीको दुरी पार गर्दै, राइडरहरूले ट्रायम्फको स्पिड ४०० र स्क्र्याम्बलर ४०० एक्समा नेपालको विविध भू–भागहरूमा यात्रा गरे — जसले यी मोटरसाइकलहरूको कठिन र उबडखाबड बाटोमा पनि उत्कृष्ट प्रदर्शन क्षमतालाई प्रमाणित गरेकाे बताइएको छ । यस राइडले नेपालको सांस्कृतिक सम्पदा प्रवद्र्धन, स्थानीय व्यवसायहरूलाई टेवा र दुई पांग्रे पर्यटनको बढ्दो सम्भावनालाई उजागर ग-यो ।

पहिलो दिन राइडको सुरुआत ट्रायम्फ नेपाल शोरुमबाट भयो । बाइकर्स क्याफेमा बिहानको नास्ता पश्चात् राइडरहरू मुग्लिन, हेम्जा हुँदै कुश्मा पुगे ।
दोस्रो दिन देउराली र टिटी ताल घुम्दै राइडरहरू बेलुकाको बास मार्फा गाउँमा गर्न पुगे ।

तेस्रो दिन जोमसोम नजिकको धुम्बा ताल, लुब्रा पास र निल्गिरी भ्यु पोइन्ट हुँदै हिन्दू तथा बौद्धहरूको साझा तीर्थस्थल मुक्तिनाथ मन्दिरसम्मको यात्रा सम्पन्न भयो ।

चौथो दिन चुनौतीपूर्ण मार्ग पार गर्दै राइडरहरू प्राचीन पर्खालले घेरिएको मुस्ताङको राजधानी लो–मान्थाङमा पुगे ।

पाँचौं दिन शिजा झोङ गुफा, कोरला सीमा र अन्नपूर्ण माउन्टेन भ्यु पोइन्टको अवलोकन गर्दै लाे-मान्थाङमै बास बसे ।

छैठौं दिन स्याङबोचे, जोमसोम जस्ता मनमोहक ठाउँ पार गर्दै राइडरहरू तातोपानी पुगेर तातो पानीको कुन्डमा स्नान लिइ विश्राम गरेका थिए ।

सातौं दिन हेम्जा, घाँसिकुवा जस्ता रमणीय स्थल हुँदै कुरिनटारमा दिनको अन्त्य भयो ।

आठौं दिनको यात्रा गल्छी, बिदुर, शिवपुरी हुँदै बाइकर्स क्याफेमा पुगेर ८ दिनको यात्रा सम्पन्न भयो ।

ट्रायम्फ नेपालका म्यानेजर सागर थापा भन्छन - एपिक राइडः इकोज अफ दि लस्ट किङ्डम केवल एक मोटरसाइकल यात्रा मात्र नभएर आजीवन बिर्सिनै नसकिने रोमाञ्चक यादहरु बने ।