महिनामा औसत ८८५ युनिट विद्युतीय कार आयात, सबैभन्दा बढी चीनबाट

काठमाडौं–नेपालमा विद्युतीय कार (ईभी) को आयात बढ्दै गएको छ । चालु आर्थिक वर्षको नौ महिना (साउनदेखि चैतसम्म) मा आयात भएको कुल ईभीलाई हेर्दा नेपालमा हरेक महिना औसतमा ८८५ युनिट विद्युतीय कार आयात भएको देखिन्छ ।

सो अवधिमा ७ हजार ९६७ युनिट ईभी आयात भएको हो । जुन अघिल्लो वर्षको सोही अवधिको तुलनामा ८७४ युनिटले बढी हो । यसरी आयात भएको कारको ठूलो हिस्सा चिनियाँ ब्रान्डले होल्ड गरेका छन् । ९ महिनाको उक्त अवधिमा चीनबाट मात्रै ५ हजार ९०२ युनिट विद्युतीय कार आयात आयात गरिएको छ भने भारतबाट २ हजार २३ युनिट आयात भएको छ ।

यसरी भित्रिएका विद्युतीय कारमा सबैभन्दा धेरै ५१ देखि १०० किलोवाट गाडीहरु छन् । ९ महिनाको समयावधिमा ५१ किलोवाटदेखि १०० किलोवाटको ४ हजार ४१४ युनिट ईभी आयात भएका हुन् । ५० किलोवाटसम्मको २ हजार ७८३ युनिट भित्रिएका छन् ।

यस्तै, १०१ देखि २०० किलोवाटसम्म ७४२ युनिट आयात भएका छन् भने २०१ देखि माथि १९ युनिट आयात भएका छन् । चीन र भारतपछि तेस्रो धेरै ईभी जर्मनीबाट ३१ युनिट आयात गरिएको छ । अन्य देशबाट नगन्य मात्रामा ईभी आयात भएका छन् ।