सन्दर्भ अन्तर्राष्ट्रिय महिला दिवस : नेपालमा बढ्दै महिला राइडरको क्रेज

गत मंसिर महिनामा भारतको गोवामा सम्पन्न टीभीएस मोटोसोल २०२४ को १२५ सीसी स्कुटर डर्ट रेस श्रेणीमा नेपाली राइडर वर्षा बस्नेतले उपाधि हासिल गरिन् । प्रत्येक वर्ष सम्पन्न हुने यस प्रकारको इभेन्टमा नेपाली महिला राइडरले सो उपाधि हासिल गर्नु महत्वपूर्ण थियो ।

वर्षा बस्नेतले यो भन्दा पहिले पनि नेपाल र अन्य देशमा भएका विभिन्न प्रतियोगितामा सहभागिता जनाएर फरक पहिचान कायम गरेकी छिन् । मोटर स्पोर्ट्स क्लब नेपाल र नेपाल अटोमोबाइल्स एसोसिएसन (नासा नेपाल) लगायतका विभिन्न संघ संस्थाले आयोजना गर्ने प्रतियोगितामा उनको सहभागिता रहने गरेको छ ।

केही समय पहिले फागुनको दोस्रो सातामा सातदोबाटोस्थित अन्तर्राष्ट्रिय खेलकुद परिसरमा सम्पन्न रेसनारी २०२५ को राउन्ड १ विजेता नवाङ मोक्तान बनिन् । सो प्रतियोगितामा फर्स्ट रनर अप सुरक्षा केसी र सेकेन्ड रनर अप नितिका गजुरेल बनेका थिए ।

नेपालमा समय समयमा महिला राइडर लक्ष्यित विभिन्न कार्यक्रम र प्रतियोगिता भइरहेको पाइन्छ । विभिन्न राइडिङ र -याली लगायतका कार्यक्रममा महिला राइडरहरुको उल्लेख्य सहभागिता रहेको पाइन्छ । सडक सुरक्षा र साहसिक पर्यटन जस्ता सामाजिक सरोकारका विषयमा समेत यस्ता कार्यक्रमले चेतना जगाउन भूमिका खेलिरहेको हुन्छ । यसमा महिला राइडरहरुको भूमिका महत्वपूर्ण हुन्छ ।

चर्चित राइडर सुरक्षा केसी महिला मोटो भ्लगरको रुपमा समेत लोकप्रिय छिन् । नेपालकै नम्बर वान मोटो भ्लगरको पहिचान कायम गरेकी सुरक्षाले अन्य राइडर र सामान्य व्यक्तिका लागि समेत विभिन्न स्थानमा पुगेको भ्लगमार्फत महत्वपूर्ण जानकारी प्रदान गरिरहेकी छिन् ।

नेपालमा हाल महिला राइडरहरुको संख्या समेत बढ्दै गएको छ । नेपाली महिला राइडरहरुको समूह ‘वुमन इन्टरनेसनल मोटरसाइकल एसोसिएसन’ अर्थात विमा नेपाल कार्यरत छ । विमा नेपालका अनुसार सय भन्दा बढी महिला राइडर याे क्षेत्रमा क्रियाशील छन् ।

मोटरसाइकल वा स्कुटर राइडर महिलाहरुको संख्या नेपालमा प्रशस्तै छ । राइड सेयरिङ व्यवसायमा समेत यस्ता राइडरहरुको संख्या बढ्दो छ । पठाओ नेपालले २०७७ सालमै राम्रो काम गर्ने २५ पठाओ राइडरलाई सम्मान गरेको थियो । अहिले पनि पठाओमा आवद्ध राइडरहरु प्रशस्तै रहेका र उनीहरु राइड सेयरका साथै फुड डेलिभरी कार्यमा समेत संलग्न रहेका छन् ।

विभिन्न कम्पनीहरुले समय समयमा गर्ने राइड कार्यक्रममा समेत महिलाकाे संख्या बढ्दो छ । थाेरै प्रतिशत भए पनि बस, टेम्पो, अटाे लगायतका सवारी साधन चलाउने महिला समेत छन् ।