नेपालको शोरुममा बीवाईडीको सबैभन्दा कम मूल्यको ईभी सिगल

काठमाडौं – बीवाईडीको सबैभन्दा सस्तो अर्थात कम मूल्यको ईभी सिगल काठमाडौंमा देखिएको छ । नक्सालस्थित शोरुममा सो ईभी देखिएको हो । हाल सो ईभीको तस्बिर सामाजिक सञ्जालमा भाइरल बनेको छ ।

बीवाईडीका अन्य मोडल समेत धेरैले रुचाएको समयमा सबैभन्दा कम मूल्यको हुने अनुमान गरिएको सिगलको वारेमा धेरैले चासो राख्नु स्वाभाविकै हो । नेपालका लागि बीवाईडीको आधिकारिक वितरक साइमेक्स इंकले एक युनिट सिगल परीक्षणका लागि भित्र्याएको जानकारी सार्वजनिक भए पनि पहिले यसरी तस्बिर पनि सार्वजनिक भएको थिएन ।

बीवाईडी सिगल ३० लाख रुपैयाँ भन्दा कम मूल्यमै उपलब्ध हुने अनुमान गरिएको छ । यसका आधारमा मूल्य र ब्रान्ड तथा फिचर रुचाउने ग्राहकका लागि बीवाईडी सिगल उपयुक्त विकल्प हुने अनुमान गर्न सकिन्छ । यद्यपि कम्पनीले यसको मूल्य र फिचर लगायतका अन्य जानकारी भने अझै सार्वजनिक गरेको छैन ।

बीवाईडी सिगल पहिलो पटक सांघाईमा सम्पन्न अटो एक्सपो २०२३ मा सार्वजनिक भएको थियो । बुकिङ खुलेको २४ घण्टामै यसको १० हजार युनिट बिक्री भएको थियो ।

ई–प्लेटफर्म ३.० मा निमाण गरेको सो कारलाई बीवाईडीले ३० र ३८ किलोवाट आवर एलएफपी व्याट्री अप्सनमा सार्वजनिक गरेको थियो । जसमध्ये ३० किलोवाट आवर जडित भेरिएन्टले ३०५ र अर्को लङ रेन्ज भेरिएन्टले ४०५ किलोमिटर रेन्ज दिने दावी गरिएको छ । यी दुवै व्याट्री अप्सनले डीसी फास्ट चार्जर सपोर्ट गर्ने जनाइएको छ । कारलाई ३० मिनेट भित्र ८० प्रतिशतसम्म चार्ज गर्न सकिन्छ ।

सिगलमा ५५ किलोवाटको मोटर जडान गरिएको छ । जसको पावर ७५ एचपी छ भने यसलाई १३० किलोमिटर प्रतिघन्टाको टप स्पिडमा गुडाउन सकिन्छ । कारमा ५ इन्चको इन्स्ट्रयुमेन्ट क्लस्टर, १२.८ इन्चको टचस्क्रिन इन्फोटेन्मेन्ट सिस्टम, फ्ल्याट वटम स्टेरिङ ह्विल, वायरलेस चार्र्जिङ प्याड र दुईवटा कप होल्डर लगायत फिचर दिइएको छ ।

यद्यपि नेपाली बजारमा उपलब्ध हुने बीवाईडी सिगलको फिचर र अन्य विभिन्न विषयको जानकारी भने साइमेक्स इंकले सार्वजनिक गरेको छैन । सायद केही समयमै यसको औपचारिक जानकारी सार्वजनिक हुनेछ ।