१५ वर्ष पुराना सवारी साधनलाई दिल्ली सरकारले इन्धन नदिने

भारतको नयाँ दिल्ली सरकारले १५ वर्षभन्दा पुराना सवारी साधनलाई अप्रिल १ देखी इन्धन नदिने बताएको छ ।

दिल्लीका वातावरणमन्त्री मनजिन्दर सिंह सिरसाले १५ वर्ष वा सोभन्दा पुराना सवारी साधनलाई १ अप्रिलदेखि इन्धन नदिने घोषणा गरेका हुन् ।

१५ वर्ष वा सोभन्दा पुराना गाडीको अवस्था पत्ता लगाउन नव गठित दिल्ली सरकारले एक विशेष पाइलट प्रोजेक्ट सुरु गरेको छ । विशेष ग्याजेट प्रयोग गर्ने भनिएको यो प्रणाली ५ सय पेट्रोल पम्पमा जडान गरिएको छ । त्यस्ता सवारी साधनको पहिचान गर्न विशेष टोली गठन गरिने पनि सिरसाले बताए ।

सरकारले राष्ट्रिय हरित न्यायाधिकरणको २०१५ आदेशलाई कडाईका साथ लागू गर्ने लक्ष्य राखेको छ, जसले १० वर्ष पुरानो डिजेल र १५ वर्ष पुरानो पेट्रोल र सीएनजी सवारी साधनहरूमा प्रतिबन्ध लगाएको छ ।

एयरपोर्ट वरपरका सवारी साधनको आवतजावतमा उत्सर्जन स्तरको अनुगमन गरिने सिरसाले बताए । सरकारले वृक्षारोपण अभियान सञ्चालन गर्न ऋण प्रणाली तथा क्लाउड सीडिङका लागि योजनाहरू पनि अघि सारेको छ ।