ट्रयाक्सन कन्ट्रोल भनेको के हो? कसरी काम गर्छ र यो किन महत्त्वपूर्ण सेफ्टी फिचर हो ?

के तपाईंलाई थाहा छ ट्रयाक्सन कन्ट्रोल भनेको के हो? कारमा सेफ्टी फिचरको रुपमा प्रदान गरिने ट्रयाक्सन कन्ट्रोलले चिप्लो वा खतरनाक अवस्थामा गाडीको टायर र सडक बीच उचित पकड कायम राख्न मद्दत गर्छ । सो सिस्टमले पाङ्ग्राको अत्यधिक घुमाइलाई रोक्छ, जसले गर्दा गाडीलाई सडकमा सन्तुलन कायम राख्न मद्दत गर्छ। आवश्यकता अनुसार ट्रयाक्सन कन्ट्रोल खोल्न वा बन्द गर्न सकिन्छ।

सो सिस्टमले गाडीको पाङ्ग्रामा जडान गरिएको सेन्सरको मद्दतले काम गर्छ । साे सेन्सरले गाडीको गति र टायरको ग्रिप निगरानी गर्छ । टायरको गति गाडीको गतिभन्दा बढी भयो भने, यसले चिप्लिने वा हाइड्रोप्लानिङ हुन सक्छ। यस्तो समयमा ट्रयाक्सन कन्ट्रोल स्वतः सक्रिय हुन्छ र ओभर-स्पिनिङ टायरको गति कम गरेर ग्रिप पुनर्स्थापित गर्छ । यस समयमा कारमा हल्का झट्का महसुस हुन्छ, जसले सेफ्टी सिस्टम सक्रिय भएको संकेत गर्छ । सो सिस्टम एन्टी-लक ब्रेकिङ सिस्टमसँग मिलेर काम गर्छ। एबीएसले ब्रेक लगाउँदा पाङ्ग्रा लक हुनबाट रोक्छ, जसले गर्दा गाडीको स्टेयरिङ नियन्त्रण कायम रहन्छ।

सामान्यतया ट्रयाक्सन कन्ट्रोल सधैं सक्रिय राख्नु उत्तम हुन्छ । यद्यपि यो सिस्टम गाडी स्टार्ट गर्दा अटोमेटिक सक्रिय रहन्छ। यसलाई विशेष गरी खतरनाक मौसमी अवस्था जस्तै: भारी वर्षा, हिमपात वा हिउँ पर्ने सडकमा खोलेर राख्नुपर्छ।

यो सिस्टमले चिप्लो बाटोमा चिप्लनबाट रोक्न मद्दत गर्छ र गाडीको ग्रिप कायम राख्छ। घुमाउरो बाटोमा वा खराब मौसममा तीव्र मोड लिँदा ट्रयाक्सन कन्ट्रोल विशेष गरी महत्त्वपूर्ण हुन्छ। यसले गाडी चिप्लनबाट र सम्भावित दुर्घटना हुनबाट जोगाउँछ। सकेसम्म ट्रयाक्सन कन्ट्रोललाई सधैं सक्रिय राख्नु नै राम्रो हुन्छ ।