नवाङ मोक्तान बनिन् रेसनारी २०२५ राउन्ड १ विजेता

काठमाडौं – महिला मोटरसाइकल रेसरहरुको प्रतियोगिता रेसनारी २०२५ को राउन्ड १ विजेता नवाङ मोक्तान बनेकी छिन् । शनिबार ललितपुरको सातदोबाटोस्थित अन्तर्राष्ट्रिय खेलकुद परिसरमा भएको प्रतियोगितामा मोक्तान विजयी बनेकी हुन् ।

प्रतियोगितामा फर्स्ट रनर अप सुरक्षा केसी र सेकेन्ड रनर अप नितिका गजुरेल बनेका थिए ।

नेपाल अटोमोबाइल्स एसोसिएसनको सहकार्यमा मोटर स्पोर्ट्स नेपाल क्लब नेपाल र वुमन्स इन्टरनेसनल मोटरसाइकल एसोसिएसन (विमा नेपाल) ले आयोजना गरेको सो रेसनारी २०२५ मा राइडरहरुले १५० सीसीको यामाहा आर१५ भी३ मोटरसाइकल कुदाएका थिए ।

रेसनारी २०२५ को सिजन १ अन्तर्गत सो प्रतियोगिता भएको हो । आगामी दिनमा अन्य स्थानमा समेत यस्तै प्रतियोगिता आयोजना गरिने मोटर स्पोर्ट्स क्लब नेपालका अध्यक्ष सर्जल वैद्यले बताए ।

विभिन्न मोटरसाइकल र यससँग सम्बद्ध पार्ट्स र एसेसरिज तथा लुब्रिकेन्ट लगायत कम्पनीको सहकार्यमा सो प्रतियोगिता आयोजना भएको थियो ।