बन्द हुने भयो मारुतीको सेडान कार ‘सियाज’, यस्तो छ कारण

मारुती सुजुकीले आफ्नो मिड साइज सेगमेन्टको सेडान कार ‘सियाज’को उत्पादन बन्द गर्ने भएको छ । मिडिया रिपोर्टका अनुसार यसको उत्पादन मार्च २०२५ सम्ममा बन्द हुने र बिक्री अप्रिलसम्ममा बन्द हुने अपेक्षा गरिएको छ ।

केही महिनादेखि मारुती सियाजको बिक्री निरन्तर घट्दो क्रममा रहेको छ । यसको बिक्री २०२४ अक्टोबरमा ६५९ युनिट, नोभेम्बरमा ५९७ युनिट र डिसेम्बर २०२४ मा ४६४ युनिट रहेको थियो, जुन धेरै कम संख्या हो ।

मारुती सियाज बन्द हुनुमा मुख्य तीन कारणहरु छन् :

डिजेल इन्जिन बन्द हुनु : मारुती सुजुकीले सन् २०२० मा सियाजको डिजेल इन्जिन बन्द गरेको थियो । यसको मुख्य कारण सियाजको लागि विकसित १.५ डीडीआईएस डिजेल इन्जिन लन्च भएको एक वर्षपछि नयाँ बीएस६ उत्सर्जन मापदण्ड लागु हुनु थियो । यसले ती मापदण्ड पूरा गर्न सकेन, जसले यसको इन्जिन बन्द गर्नु परेको थियो । यस कारणले गर्दा सेडानको १.५ लिटर पेट्रोल इन्जिनको विकल्प मात्र उपलब्ध थियो, जबकि यसको बिक्रीको ३० प्रतिशत डिजेल इन्जिनबाट मात्र आएको थियो ।

समय समयमा अपडेट नहुनु : सियाजको बिक्री घट्नुको अर्को कारण यसलाई समय-समयमा अपडेट नगर्नु हो। यसलाई पछिल्लो पटक २०१८ मा अपडेट गरिएको थियो । सियाजमा एडास, सनरुफ, डिजिटल इन्स्ट्रयुमेन्ट क्लस्टर र टर्बो-पेट्रोल इन्जिन अपडेट गर्नुको सट्टा एस्पिरेटेड इन्जिनलाई नै निरन्तरता दिइरहयो । जसले गर्दा यसको बिक्री घट्न थाल्यो ।

सेडान कारको लोकप्रियतामा कमी : हालको बजार ट्रेन्ड अनुसार एसयूभी मोडेल बढी लोकप्रिय भइरहेको छ, जसका कारण सेडान कारको बिक्रीमा विस्तारै कमी भइरहेको छ । मारुती सुजुकीले पनि एसयूभी तर्फ आफ्नो ध्यान केन्द्रित गरेको छ। जसको असर सेडान कार सियाजमा परेको देखिन्छ ।