बीवाईडी सिलको सस्तो भर्सन ई७ ? ईभी ट्याक्सीको रुपमा प्रयोग हुने सम्भावना

बीवाईडीको इलेक्ट्रिक सेडानलाई चीनको सरकारी मन्त्रालयले दिएको नाम सार्वजनिक भएको छ । ई७ नाम दिइएको सो सेडान साइजका आधारमा हल्का छ भने यसको नाम पनि रोचक रहेको छ ।

बीवाईडीले पहिलो पटक बजारमा ल्याएको इलेक्ट्रिक भेइकलको नाम ई६ थियो । सो कार नेपाली बजारमा समेत उपलब्ध थियो । पछि यसलाई अपग्रेड गरी अल न्यु ई६ राखियो । यद्यपि बीवाईडीले यो भन्दा पछिल्लो समयमा कुनै पनि ईभीको नाम ई अल्फाबेटबाट राखेको थिएन ।

यो भन्दा पहिले कम मूल्यका इलेक्ट्रिक कारको नाम भने ई५ राख्ने गरिएको थियो । फर्स्ट जेनेरेसन किनको सस्तो अल–इलेक्ट्रिक भर्सनलाई यो नाम दिइएको थियो । अब फेरि ई जोर्डिएर आएको नामका कारण नयाँ ईभीको मूल्य पनि धेरै नहुने अनुमान भने गरिएको छ ।

नयाँ कार चीनमा उद्योग र सूचना प्रविधि मन्त्रालयमा दर्ता हुने गरेको छ । यसको लम्बाई, चौडाई र उचाई क्रमशः ४७८० एमएम, १९०० एमएम र १५१५ एमएम छ । यसको ह्विलबेस २८२० एमएम छ ।

रोचक तथ्य के छ भने यही नाप बीवाईडीले पहिले नै बजारमा ल्याएको इलेक्ट्रिक सेडान सिलसँग धेरै मिल्दोजुल्दो छ । जसको लम्बाई, चौडाई र उचाई क्रमशः ४८०० एमएम, १८७५ एमएम र १४६० एमएम छ तथा ह्विलबेस २९२० एमएम छ ।

यसका आधारमा ई७ चाहिं सिलको सस्तो भर्सन हो भनेर अनुमान समेत लगाइएको छ । यसमा १०० किलोवाटको इलेक्ट्रिक मोटर छ भने टप स्पिड १५० किलोमिटर प्रतिघण्टा छ । यसमा १६ इन्चको ह्विल छ ।

यी सबै तथ्यका आधारमा मूल्य कम गर्नका लागि यसमा केही फिचर कमी गरिएको छ र रेन्ज भने बढाइएको छ भन्न सकिन्छ । यसको ब्याट्री प्याकका वारेमा भने केही बताइएको छैन । यद्यपि यसमा बीवाईडीको लिथियम आइरन फस्फेट ब्लेड ब्याट्री प्रयोग हुने अनुमान गर्न सकिन्छ ।

यी सबै तथ्यका आधारमा भविष्यमा ई७ लाई राइड सेयरिङ सर्भिस वा ट्याक्सीको रुपमा प्रयोग गर्न सकिने अनुमान गरिएको छ । यसो भयो भने बीवाईडी समेत इलेक्ट्रिक ट्याक्सी व्यवसायको बजारमा प्रवेश गर्ने अनुमान गर्न सकिन्छ ।

नेपाली बजारमा पहिले सुजुकीका ट्याक्सी लोकप्रिय भइरहेको समयमा हाल टाटाको ईभी ट्याक्सीले बजार लिइरहेको छ । टाटाको एक्सप्रेस–टी ईभीले अहिले चर्चा पाएको छ । हालै ईभीइजी नाममा आएको सो ट्याक्सी जेएमईभी ब्रान्डको हो ।

नेपाली बजारमा बीवाईडीका ईभी हाल सर्बाधिक लोकप्रिय ईभीमा पर्छन् । भविष्यमा बीवाईडीले समेत ट्याक्सी भर्सन बजारमा ल्यायो भने अवश्य पनि अर्को प्रतिस्पर्धी थपिने अनुमान गर्न सकिन्छ ।