एमजी विन्डसर ईभीले पायो ग्रिन कार अफ द इयर २०२५ अवार्ड, यी हुन् अन्य विजेता

भारतमा अटोमोबाइल क्षेत्रको सबैभन्दा प्रतिष्ठित र ठूलो मानिने अवार्ड शो इन्डियन कार अफ द इयर र इन्डियन मोटरसाइकल अफ द इयरको यो वर्षको विजेता घोषणा गरिएको छ ।

यस अनुसार महिन्द्रा थार रोक्स र अप्रिलिया आरएस ४५७ ले सबै प्रतिद्वन्दीलाई पछाडि पारेर सो उपाधि हासिल गरेका छन् । त्यसैगरी एमजी विन्डसर ईभीले ग्रिन कार अफ द इयर २०२५ अवार्डबाट सम्मानित गरिएको छ भने प्रिमियम कार अफ द इयर २०२५ को अवार्ड मर्सिडिज बेन्ज ई–क्लास लङ ह्विलबेसले पाएको छ ।

जेके टायरको आयोजनामा प्रत्येक वर्ष हुने सो अवार्ड समारोहको यो वर्ष २०औं संस्करण हो । अटोमोबाइल क्षेत्रका प्रतिष्ठित व्यक्ति र पत्रकारहरुको समूहले विभिन्न मोडलबाट विजेताको छनोट गर्ने गर्छन् ।

इन्डियन कार अफ द इयर २०२५ को रेसमा विभिन्न कारहरु थिए । ती मध्ये महिन्द्रा थार रोक्सले सो अवार्ड जित्यो भने दोस्रो र तेस्रो स्थानमा क्रमशः मारुती सुजुकी डिजायर सेडान र स्विफ्ट ह्याचब्याक रहे ।

त्यसैगरी इन्डियन मोटरसाइकल अफ द इयर २०२५ को उपाधि अप्रिलिया आरएस ४५७ ले पायो भने दोस्रो स्थानमा विश्वकै पहिलो सीएनजी मोटरसाइकल बजाज फ्रिडम १२५ र तेस्रो स्थानमा हिरो एक्सट्रिम १२५ आर रहे ।

त्यसैगरी इन्डियन ग्रिन कार अफ द इयर अवार्ड पाएको एमजी विन्डसर ईभीले दोस्रो स्थानमा रहेको बीएमडब्ल्यु आई५ र तेस्रो स्थानमा रहेको बीवाईडी सिललाई पछि पारेर सो उपाधि हासिल गरेको थियो ।