वुलिङले ल्यायो म्याजिक ब्याट्री, ६ हजार ५ सय साइकलको लाइफ हुने

ईभी निर्माता कम्पनीको रुपमा परिचित वुलिङले पहिलो पावर ब्याट्रीको रुपमा म्याजिक ब्याट्री इन्डोनेसियामा सार्वजनिक गरेको छ । यस अनुसार इन्डोनेसियामा पहिलो पावर ब्याट्री उत्पादन गर्ने पहिलो चाइनिज अटोमोबाइल कम्पनीको रुपमा वुलिङ परिचित बनेको छ ।

गत डिसेम्बर ३१ मा प्रोडक्सन लाइनमा रोल्ड अफ गरिएको सो ब्याट्री उत्पादन गर्नका लागि प्रक्रिया प्रारम्भ पश्चात साढे ४ महिना लागेको छ ।

एसएआईसी, वुलिङ र जीएमको संयुक्त स्वामित्व रहेको म्याजिक ब्याट्री ब्रान्ड पहिलो पटक गत सेप्टेम्बरमा इन्डोनेसियाको जाकार्तामा लन्च गरिएको र त्यही वर्ष नै स्थानीय उत्पादनको रुपमा उत्पादन गरिने घोषणा गरिएको थियो । यसका लागि ४० मिलियन युआन अर्थात करिव ५५ लाख डलर खर्च भएको छ ।

म्याजिक ब्याट्रीले ३०० किलोवाट भन्दा बढीको पिक पावर दिन्छ भने यसको इनर्जी डेन्सिटी १६५ वाट आवर पर केजी छ । यसको लाइफ ६ हजार ५ सय साइकल हुनेछ ।

लिथियम आइरन फस्फेट टाइपको सो ब्याट्रीमा परम्परागत यु आकारको ट्याबको सट्टा एल आकारको ट्याब भएको बताइएको छ । यसैगरी थर्मल रनअवेबाट बचाउनका लागि यसमा सेरामिक लेयर प्रयोग गरिएको छ भने यसमा कम्पनीद्वारा विकास गरिएको इन्टेलिजेन्ट ब्याट्री म्यानेजमेन्ट सिस्टमको प्रयोग गरिएको छ ।

वुलिङ विशेष गरी सवारी साधन निर्माता कम्पनीको रुपमा परिचित छ । नेपाली बजारमा समेत वुलिङ एयर ईभी र वुलिङ बिंगो ईभी लगायतका ईभी बिक्रीका लागि उपलब्ध छन् ।