दिपल एस०७ र लिपमोटर सी१० सहित ४ नयाँ चाइनिज कारले पाए युरो एनक्यापमा फाइभ स्टार रेटिङ

डिसेम्बर महिनामा सम्पन्न युरो एनक्याप क्र्यास टेस्टमा थप चार नयाँ चाइनिज ब्रान्डका कारले फाइभ स्टार रेटिङ पाएका छन् ।

चांगान दिपल एस०७, स्टेलान्टिसको लिपमोटर सी१०, एसएआईसीको म्याक्सस ई–टेरेन ९ र भल्वो ईएक्स३० ले सो रेटिङ पाएका हुन् ।

यी मध्ये म्याक्सस ई–टेरेन ९ ले समग्रमा सबैभन्दा बढी रेटिङ पाएको छ । यो हाई–इन्ड इलेक्ट्रिक पिकअप ट्रक हो ।

त्यसैगरी चांगानको दिपल एस०७ ले एडल्ट अकुपेन्ट क्याटागोरीमा सबैभन्दा बढी अर्थात ९५ प्रतिशत स्कोर पाएको छ । युरो एनक्याप २०२४ मा मूल्यांकन गरिएका कार मध्ये यो सबैभन्दा बढी स्कोर हो । दिपल एस०७ ले चाइल्ड अकुपेन्टमा ८७, सेफ्टी असिस्टमा ७७ र भल्नरेवल रोड युजरमा ७४ प्रतिशत रेटिङ पाएको छ ।

जिकर एक्स र स्मार्ट वानको प्लेटफर्म सेयर गरिएको कम्प्याक्ट एसयूभी भल्वो ईएक्स३० ले एडल्ट सेफ्टीमा ८८ र चाइल्ड अकुपेन्टमा ८५ प्रतिशत स्कोर पाएको छ ।

लिपमोटर सी१० क्रसओभरले एडल्ट अकुपेन्टमा ८९ र चाइल्ड अकुपेन्टमा ८५ प्रतिशत स्कोर पाएको छ । यसले भल्नरेवल रोड युजर र एक्टिभ सेफ्टी क्याटागोरीमा क्रमशः ७७ र ७६ प्रतिशत स्कोर पाएको छ ।

यी मध्ये दुई मोडल दिपल एस०७ र लिपमोटर सी१० नेपाली बजारमा पनि उपलब्ध छन् । दिपल एस०७ लाई एमएडब्लु वृद्धि र लिपमोटर सी१० लाई सांग्रिला मोटर्सले बिक्री–वितरण गरिरहेका छन् । नेपाली बजारमा यी ईभीको राम्रो चर्चा समेत छ ।