लन्च भएको १ महिना नवित्दै नयाँ डिजायरलाई ३० हजार युनिट बुकिङ

मारुती सुजुकीले हालै लन्च गरेको नयाँ डिजायर भारतमा लोकप्रिय बन्दै गएको छ । लन्च भएको १ महिना नवित्दै नयाँ डिजायरले ३० हजार युनिट बुकिङ पाएको कम्पनीले दावी गरेको छ ।

मारुती सुजुकीका अनुसार डिलरशिपहरूले प्रतिदिन १ हजार भन्दा बढी बुकिङहरू पाइरहेका छन् । जुन, तेस्रो–जेनरेशन डिजायरको भन्दा दोब्बरले बढि हो । कुल बुकिङको आधा हिस्सा टप स्पेकका दुई मोडलले लिएको पनि कम्पनिले खुलासा गरेको छ ।

नयाँ डिजायरको बुकिङ नोभेम्बर ४ मा खुलेको थियो भने कार आधिकारिक रूपमा नोभेम्बर ११ मा लन्च गरिएको थियो । सुजुकीको सो नयाँ कम्प्याक्ट सेडान एलएक्सआई, भिएक्सआई, जेडएक्सआई र जेडएक्सआई प्लस गरी कुल चार भेरियन्टमा उपलब्ध छ । जसको सुरुवाती मूल्य ६ लाख ७९ हजार भारु निर्धारण गरिएको छ ।

नयाँ डिजायरमा सुजुकीले आफ्नो नयाँ इन्जिन जेड१२ ई १.२ जडान गरेको छ । तीनवटा सिलिन्डर भएको उक्त इन्जिनले ८१ बीएचपी र ११२ एनएम टकए जनेरेट गर्दछ । यसलाई ५ स्पीड म्यानुअल वा ५ स्पीड एएमटीसँग जोडिएको छ । सो नयाँ कार फ्याक्ट्री फिटेड सीएनजी विकल्पमा समेत उपलब्ध छ ।