ब्याट्री र इलेक्ट्रिफिकेसन अनुसन्धानका लागि आईआईटीजसँग हुन्डाईको सहकार्य घोषणा

हुन्डाई मोटर ग्रुपले तीन वटा इन्डियन इन्स्टिच्युट अफ टेक्नोलोजी (आईआईटीज) सँग मिलेर ब्याट्री र इलेक्ट्रिफिकेसनको क्षेत्रमा संयुक्त अनुसन्धानका लागि सहकार्य गर्ने घोषणा गरेको छ । आईआईटी दिल्ली, आईआईटी बम्बे र आईआईटी मद्रास गरी तीन इन्स्टिच्युट यसमा संलग्न हुनेछन् ।

आईआईटी दिल्लीमा हुन्डाई मोटर ग्रुपको प्रायोजनमा हुन्डाई सेन्टर अफ एक्सिलेन्स (सीओई) स्थापना गरिने छ । हुन्डाई सेन्टर अफ एक्सिलेन्सले ब्याट्री र इलेक्ट्रिफिकेसनमार्फत गरिने ड्राइभिङ एड्भान्समेन्टका लागि आवश्यक नेतृत्व गर्नेछ, जसले विशेष गरी भारतीय बजारलाई लक्ष्यित गर्नेछ ।

आईआईटी दिल्लीमा भएको एक समारोहमा हुन्डाई मोटर ग्रुप र आईआईटीका प्रतिनिधिहरुले एक सहमति पत्रमा हस्ताक्षर गरे । यस अनुसार उनीहरुले ‘हुन्डाई मोटर ग्रुप – आईआईटी हुन्डाई सीओई’ को स्थापना गर्नेछन् ।

हुन्डाई मोटर ग्रुपले ५ वर्षको अवधिमा करिव ७० लाख अमेरिकी डलर लगानी गर्ने योजना बनाएको छ । यस अनुसार आगामी दिनमा सफ्टवेयर र हाइड्रोजन फ्युल सेलको क्षेत्रमा समेत कार्य गर्ने बताइएको छ ।

सीओईले यो वाहेक कोरिया र भारतका बिचमा प्राविधिक तथा मानवीय शक्तिको आदानप्रदान समेत गर्नेछ ।