गिली र भल्वोको सहायक कम्पनी लिंकको ५१ प्रतिशत सेयर जिकरले लिने

चाइनिज प्रिमियम ईभी निर्माता कम्पनी जिकरले गिली र भल्वोको सहायक कम्पनी लिंंकको सेयरको अधिकांश हिस्सा लिने भएको छ । तीनै अटो निर्माता कम्पनीका साथै नौ अन्य कार तथा ट्रक ब्रान्डको प्यारेन्ट कम्पनी जिली होल्डिङको योजना अनु्सार यो कार्य अगाडि बढाइएको हो ।

यस अनुसार जिकरले लिंकमा रहेको भल्वो कारको ३० प्रतिशत र गिली होल्डिङको २० प्रतिशत सेयर किन्ने छ । यस अनुसार समग्र मिलाएर जिकरले ५१ प्रतिशत स्वामित्व लिनेछ भने बाँकी स्वामित्व जिली अटोमोबाइल होल्डिङसँगै हुनेछ ।

यस अनुसार चाइनिज–स्विडिस ब्रान्डको भ्याल्यु २ अर्ब ५० करोड डलर हुनेछ र अर्को वर्षको जुन सम्म यो सहमति अनुसारको कार्य समापन गरिने छ ।

यस सम्बन्धी समाचार रोयटर्सले सार्वजनिक गरेको भए तापनि कम्पनीहरुले आधिकारिक रुपमा भने केही बताएका छैनन् ।

हाल जिकर र लिंकका केही उत्पादन र मूल्यमा समानता छ । यसले गर्दा पनि केही नयाँ कार्य गर्नुपर्ने आवश्यकता देखिएको थियो । लिंकले पछिल्लो समयमा बजारमा ल्याएका ईभी मोडल जेड१० र जेड२० मा जिकरकै आर्किटेक्चर प्रयोग गरिएको छ ।

अबको नयाँ व्यवस्था अनुसार जिकरले इलेक्ट्रिक र कनेक्टेड भेइकलको क्षेत्रमा कार्य गर्नेछ । तीन वर्ष पहिले मात्र स्थापना भएको जिकरले सन् २०२४ को नौ महिनाको अवधिमा १ लाख ४३ हजार कार बिक्री गरेको छ भने सन् २०१६ मा स्थापना भएको लिंकसँग हाल नौ मोडल छन् भने यो वर्ष नौ महिनाको अवधिमा करिव १ लाख ९५ हजार अर्थात गत वर्षको यही अवधिको तुलनामा ४० प्रतिशत बढी गाडी बिक्री गरेको छ ।

जिकर ब्रान्ड नेपालमा समेत हालसालै भित्रिएको छ । नेपाली बजारमा शारडा ग्रुप अन्तर्गतको पायोनियर मोटोकर्पले जिकर एक्स बिक्री–वितरण गरिरहेको छ ।