कस्टमाइज्ड भएर आयो लुयानको एस९० स्कुटर

काठमाडौं– लुयानको इलेक्ट्रिक स्कुटर ‘एस९०’ कस्टमाइज्ड भएर आएको छ । नेपाली बजारमा गत असारमा सार्वजनिक भएको यो स्कुटरमा ३ हजार वाट क्षमताको लिक्विड कुल्ड मोटर जडान भएर आएको हो ।

अहिलेको मोडेलमा पावर बढाएर ल्याइएको कम्पनीले जनाएको छ । ‘प्राय इलेक्ट्रिक स्कुटरका मोटरहरु बाहिरको हावाले मात्र चिसिने प्रविधि हुँदा केही कमजोर भएका हुन् । तर, लुयानका हरेक स्कुटरमा लिक्विड कुल्ड मोटर हुने हुँदा यसको तान्ने क्षमता अत्यधिक हुने गर्दछ ।

७२ भोल्ट ३८ एएचको ग्राफिन ब्याट्री भएकाले यसले एकपटकको फुल चार्जमा करिब १०० देखि १२० किलोमिटर सम्म रेन्ज दिने अनुमान गर्न सकिन्छ’ कम्पनीका सेल्स हेड शंकर शर्माले बताए ।

दुबै चक्कामा डिस्क ब्रेक जडान गरिएको यस स्कुटरको दुबै चक्का १२ इन्चको छ । साथै यसमा डबल डिस्प्ले क्लस्टर रहेको छ । एनएफसी अनअफ तथा एन्टिथेप्ट अलार्म समेत रहेको स्कुटरलाई ओरालोमा चलाउँदा आफै ब्याट्री चार्ज हुने प्रविधि रिजेनरेटिभ ब्रेकिङ सिस्टमको साथै व्हिल लक सिस्टम समेत उपलब्ध छ ।

विगत ५ बर्ष देखि नेपाली बजारमा लुयानले आफ्ना स्कुटरहरु बिक्री वितरण गर्दै आइरहेको छ । कम्पनीका अनुसार लुयानको एमएनके३ मोडलको नेपाली बजारमा करिब १ हजार भन्दा बढी बिक्री भएको छ । अहिले पठाओ जस्ता राइड सेयरिङ कम्पनीमा यो स्कुटर निक्कै प्रयोग भइरहेको पाइन्छ ।

लुयानले अन्य इलेक्ट्रिक स्कुटर भन्दा आफ्ना स्कुटरहरु फरक र गुणस्तरीय भएको दावी गर्दछ । इलेक्ट्रिक स्कुटरहरु पेट्रोल स्कुटर भन्दा कमजोर हुन्छन् भन्ने भ्रमलाई चिर्न सफल भएको कम्पनीको दाबी छ । कम्पनीले काठमाडौं उपत्यकाका ९ स्थानमा सर्भिस सेन्टर संचालनमा ल्याएको छ ।