पहिलो हाई-भोल्टेज इलेक्ट्रिक बाइक लन्च, फुल चार्जमा २०० किमी रेन्ज दिने, ईभी चार्जर प्रयोग गर्न सकिने

इलेक्ट्रिक सवारी साधन स्टार्टअप र्‍याप्टी डट एचभीले भारतमा आफ्नो पहिलो हाई भोल्टेज इलेक्ट्रिक बाइक र्‍याप्टी डट एचभी टी३० लन्च गरेको छ । सो बाइकले फुल चार्जमा २०० किलोमिटरसम्मको दुरी तय गर्न सक्ने कम्पनीको दाबी छ । यसलाई टी३० र टी३० स्पोर्ट गरी दुई भेरिएन्टमा ल्याइएको छ ।

र्‍याप्टी डट एचभी टी३० लाई २५० देखि ३०० सीसीको पेट्रोल बाइकलाई चुनौती दिन डिजाइन गरिएको छ ।  साथै सो इलेक्ट्रिक बाइकले टर्क क्राटस र अल्ट्राभायोलेट एफ७७ म्याच २ जस्ता इलेक्ट्रिक बाइकसँग पनि प्रतिस्पर्धा गर्नेछ । सो बाइकको डेलिभरी जनवरी देखि सुरु हुने अपेक्षा गरिएको छ ।

र्‍याप्टी डट एचभी टी३० को डिजाइनमा शार्प लाइन्स, डायमन्ड आकारको हेडलाइट र स्प्लिट-सिट सेटअप दिइएको छ । बाइकमा ७ इन्चको ब्लुटुथ कनेक्टिभिटी, जीपीएस नेभिगेसन र ओभर-द-एयर अपडेट सपोर्ट गर्ने टचस्क्रिन डिस्प्ले दिइएको छ । बाइक ४ रङमा उपलब्ध छ ।

सो इलेक्ट्रिक बाइकमा २२ किलोवाटको इलेक्ट्रिक मोटर छ, जसले ७० एनएमको टर्क जेनेरेट गर्छ । बाइकले ३.५ सेकेण्डमा ० देखि ६० किलोमिटर प्रतिघण्टाको गति लिन सक्छ र यसको टप स्पिड १३५ किमी प्रतिघण्टा छ । यसमा कम्फर्ट, पावर र स्प्रिन्ट गरी तीन वटा सवारी मोड छ । बाइकमा ५.४ किलोवाट क्षमताको ब्याट्री प्याक छ, जसले फुल चार्जमा १५० किलोमिटरको वास्तविक रेन्ज र २०० किलोमिटरको आईडीसी रेन्ज दिन्छ ।

र्‍याप्टी डट एचभी टी३० मा इलेक्ट्रिक कारमा प्रयोग हुने हाई भोल्टेज सीसीएस२ चार्जर प्रयोग गरिएको छ । बाइकको राम्रो राइडिङ अनुभवको लागि यूएसडी फ्रन्ट फोर्क र रियर मोनोशक सस्पेन्सन समावेश गरिएको छ ।