कावासाकी ब्रान्डका बाइक अब नेपालमा पनि उपलब्ध हुने, विशाल ग्रुप बन्यो आधिकारिक वितरक

काठमाडौं – कुनै समय नेपाली बजारमा उपलब्ध भएर बन्द भएको कावासाकी ब्रान्ड फेरि नेपाल प्रवेश गर्ने भएको छ । नेपालका लागि आधिकारिक वितरकको रुपमा विशाल ग्रुप अन्तर्गतको एक कम्पनीले कार्य गर्नेछ ।

नेपाली बजारमा भित्र्याउनका लागि अन्य घरानाले समेत प्रयास गरिरहेको समयमा विशाल ग्रुप आधिकारिक विक्रेता बन्न सफल भएको हो । करिव एक महिना पहिले नै यस सम्बन्धी निर्णय भएको र नेपालका लागि बिजनेस हेड समेत नियुक्त भइसकेको स्रोतको भनाइ छ ।

यद्यपि यसको औपचारिक जानकारी भने सार्वजनिक भइसकेको छैन । नेपाली बजारमा कावासाकीका कम मूल्यका बाइक डब्ल्यु १७५ स्ट्रिट र निन्जा ३०० लगायतका बाइक उपलब्ध हुने अनुमान गर्न सकिन्छ ।

क्लासिक डिजाइन सहित मोडर्न इन्जिनियरिङ रहेको रेट्रो–स्टाइलको डब्ल्यु१७५ स्ट्रीट बाइकमा १७७ सीसी, सिंगल सिलिन्डर, एयर कुल्ड इन्जिन छ । साथै यसमा अलोय ह्विल र ट्युबलेस टायर लगायतका विभिन्न विशेषता छन् ।

कावासाकी निन्जा ३०० भने सुपर बाइक हो । थ्रिलिङ एक्स्पेरियन्सका लागि यसमा एबीएस, स्लिपर क्लच र लाइटवेट च्यासिस लगायतका विशेषता रहेका छन् ।

कावासाकीको भर्सिस–एक्स ३०० बाइक पनि उपलब्ध हुने अनुमान गर्न सकिन्छ । यो एड्भेन्चर टुरिङ बाइक हो ।

नाडा अटो शो भन्दा पहिले नै यी बाइक नेपाली बजारमा सार्वजनिक हुने अनुमान समेत गरिएको थियो ।

विशाल ग्रुपले नेपाली बजारमा धेरै ब्रान्डका सवारी साधनको कारोबार गर्दै आइरहेको छ । सुजुकी मोटरसाइकल पहिले देखि नै यही ग्रुप अन्तर्गतको भीजी अटोमोबाइल्सले कारोबार गरिरहेको छ । त्यसैगरी प्यासेन्जर कार अन्तर्गत फक्सवागन, एमजी, वुलिङ, माज्दा, म्याक्सस, रेनो र जीडब्लुएम ब्रान्डको समेत आधिकारिक बिक्रेता यही ग्रुप हो ।

कोबेल्कोका कन्स्ट्रक्सन इक्विपमेन्ट र एसआरएमका विद्युतीय भ्यान समेत यही ग्रुपले बिक्री–वितरण गरिरहेको छ भने भियतनामी ब्रान्ड भिनफास्ट समेत विशाल ग्रुपले नै नेपाल भित्र्याउने समाचार पहिले नै सार्वजनिक भइसकेको छ ।

सन् २००० ताका सम्म नेपाली बजारमा कावासाकी बाइक पनि बिक्रीका लागि उपलब्ध थिए । भारतमा यी बाइकको उत्पादन बन्द भए पश्चात नेपाली बजारमा पनि यी बाइक उपलब्ध हुन छोडेका थिए ।