लिप मोटर सी१० नेपाल सहित एसिया प्यासिफिक बजारमा उपलब्ध हुने, दशैं पछि डेलिभरी योजना

काठमाडौं - लिप मोटर इन्टरनेसनलले इलेक्ट्रिक एसयूभी सी१० को पहिलो ब्याच एसिया प्यासिफिकका विभिन्न देशमा बिक्रीका लागि चीनको सांघाईबाट सिपमेन्ट गरेको छ । अत्याधुनिक प्रविधि, अद्वितीय पर्फमेन्स, एफिसियन्सी र रेन्ज सहितको सो एसयूभी टप चाइनिज ईभी स्टार्ट अपमा तेस्रोमा पर्छ । यही सेप्टेम्बर महिनामा सो ब्रान्डका ४ लाख ६० हजार गाडी डेलिभरी गरिएका छन् ।

एसिया प्यासिफिक क्षेत्रमा इलेक्ट्रिक मोबिलिटीको विकास गर्ने लक्ष्यको पहिलो कदमको रुपमा यसलाई लिइएको छ । आगामी तीन वर्ष सम्म प्रत्येक वर्ष कमसेकम एक मोडल बिक्री गर्ने लक्ष्य समेत रहेको कम्पनीको भनाइ छ ।

लिप मोटर सी१० लिप मोटरको पहिलो ग्लोबल प्रोडक्ट हो, जुन ग्लोबल डिजाइन र सेफ्टी स्ट्यान्डर्ड अनुसार बनाइएको छ । लिप मोटर आफैले विकास गरेको लिप ३.० टेक्नोलोजी आर्किटेक्चरमा आधारित सो गाडीमा यो उद्योगकै सबैभन्दा अग्रणी इन्टेलिजेन्ट इलेक्ट्रिक टेक्नोलोजी प्रयोग गरिएका छन् । यसमा सेन्ट्रल इन्टिग्रेटेड इलेक्ट्रोनिक एन्ड इलेक्ट्रिकल आर्किटेक्चर, सेल टु च्यासिस (सीटीसी) टेक्नोलोजी र यसको फ्ल्यागसिप इन्टेलिजेन्ट ककपिट जस्ता फिचर छन् ।

यो गाडीले सिंगल चार्जमा ४२० किलोमिटर डब्लुएलटीपी रेन्ज दिन्छ र फाइभ स्टार ई–एनक्याप सेफ्टी रेटिङ प्राप्त गरेको छ । यसमा ६९।९ किलोवाट आवरको एलएफपी ब्याट्री छ भने यसले १६० किलोवाट पावर र ३२० एनएम टर्क जेनेरेट गर्छ । यो गाडीले २०२३ इन्टरनेसनल सीएमएफ डिजाइन अवार्ड पाएको थियो भने हालै फ्रेन्च डिजाइन अवार्डबाट २०२४ गोल्ड अवार्ड र युएस म्युस डिजाइन अवार्डबाट समेत २०२४ गोल्ड अवार्ड नै पाएको छ ।

लिप मोटरको सी१० इलेक्ट्रिक एसयूभी नेपाली बजारमा समेत उपलब्ध हुनेछ । नेपाली बजारमा सांग्रिला मोटर्सले यसको बिक्री वितरण गर्दैछ ।

नेपाली बजारमा यसको मूल्य ७२ लाख रुपैयाँ तोकिएको छ । दशैं पश्चात यसको डेलिभरी समेत शुरु हुने कम्पनीको भनाइ छ ।