टाटाका गाडीको नयाँ रेन्ज सार्वजनिक  

टाटा मोटर्ससँग हाल इलेक्ट्रिक कारको सबैभन्दा ठुलो पोर्टफोलियो छ, कम्पनीले हालै आफ्नो पोर्टफोलियोमा नयाँ इलेक्ट्रिक एसयूभी टाटा कर्भ समावेश गरेको छ । टाटा मोटर्सका सबै इलेक्ट्रिक सवारी साधनहरु राम्रो ड्राइभिङ रेन्जमा आउने भएपनि अब कम्पनीका सबै इलेक्ट्रिक गाडीहरुको ड्राइभिङ रेन्ज परिमार्जन गरिएको कम्पनीले जानकारी दिएको छ ।

भारत सरकारको सडक, यातायात र राजमार्ग मन्त्रालयले एमआईडीसी अर्थात महाराष्ट्र इन्डष्ट्रियल डेभलपमेन्ट कर्पोरेसनको रेन्ज परीक्षण सञ्चालन गर्ने सम्बन्धमा नयाँ सर्तहरू लागू गरेपछि टाटा मोटर्सले आफ्ना इलेक्ट्रिक कारहरूको सिंगल चार्ज रेन्ज परिमार्जन गरेको हो । कम्पनीले नयाँ कर्भ ईभीको रेन्ज पनि घटाएको छ ।

टाटा कर्भ कुपे एसयूभीको ५५ किलोवाट ब्याट्री भेरिएन्टको पुरानो एमआईडीसी रेन्ज ५८५ किलोमिटर थियो, जुन अहिले घटेर ५०२ किलोमिटरमा पुगेको छ । सो गाडीको ४५ किलोवाट सानो ब्याट्री भेरिएन्टको रेन्ज ५०२ किलोमिटरबाट घटेर ४३० किलोमिटर पुगेको छ ।

एमआईडीसीले विद्युतीय सवारी साधन उद्योगमा स्ट्यान्डर्ड परीक्षण प्रक्रियालाई बुझाउँछ जुन इलेक्ट्रिक कारको वास्तविक ड्राइभिङ रेन्ज मूल्याङ्कन गर्न प्रयोग गरिन्छ । यो भारतीय सडक र ट्राफिक अवस्थालाई ध्यानमा राखेर परीक्षणको डिजाइन गरिएको हो ।

एमआईडीसीको परीक्षण चक्र शहरी ड्राइभिङ र हाईवे ड्राइभिङ परीक्षण गरी दुई भागमा विभाजन गरिएको छ । पहिला कुनै पनि इलेक्ट्रिक सवारी साधन शहरी ड्राइभिङको लागि मात्र परीक्षण गरिन्थ्यो । ईभीको लोकप्रियता र लामो दुरीको रेन्जको लागि अब शहरी ड्राइभिङ रेन्ज र हाईवे ड्राइभिङ रेन्ज अनिवार्य रुपमा परीक्षण गर्नुपर्ने भएको छ ।

सोही परीक्षण अनुसार टाटा मोटर्सको सबैभन्दा सस्तो इलेक्ट्रिक गाडी टिगोर ईभीको २४ किलोवाट भेरिएन्टले अब ३१५ किलोमिटरको सट्टा २७५ किलोमिटरसम्मको रेन्ज दिनेछ । साथै १९.२ किलोवाट भेरिएन्टले २५० किलोमिटरबाट घटेर २२१ किलोमिटरमा पुगेको छ ।

टाटा पञ्चको पनि २ भेरिएन्ट, ३५ किलोवाट भेरिएन्टले अब ४२१ किलोमिटरको सट्टा ३६५ किलोमिटरसम्मको रेन्ज प्रदान गर्नेछ । यसको २५ किलोवाट भेरिएन्टले ३१५ किलोमिटरको सट्टा २६५ किलोमिटरसम्मको रेन्ज प्रदान गर्ने भएको छ ।