यस पटकको नाडा अटो शो पहिले भन्दा भव्य र प्रभावशाली हुने व्यवसायीहरुको भनाइ

काठमाडौं - भृकुटीमण्डप प्रदर्शनी स्थलमा यही भदौ ११ गतेदेखि नाडा अटो शो–२०२४ आयोजना हुँदैछ । नाडा अटोमोबाइल्स एसोसिएसन अफ नेपालले आयोजना गर्ने उक्त शोमा भदौको १३ गतेसम्म सञ्चालन हुने छ ।

यसपटकको आयोजना हुने अटो शो पहिलेभन्दा भव्य र प्रभावशाली हुने अपेक्षा नाडाले लिएको छ । नाडा अटो शोले नेपाली अटोमोबाइल क्षेत्रमा महत्वपूर्ण योगदान र हजारौं आगन्तुकहरूलाई प्रत्येक वर्ष आकर्षित गर्दै आएको कार्यवाहक संयोजक अनुपकुमार बरालले बताए ।

यस वर्षको प्रदर्शनीमा २४ चार पाङ्ग्रे, १९ दुई पाङग्रे र १२ हल्का व्यावसायिक सवारी साधनका ब्रान्डहरू प्रदर्शन गरिने छ । साथै, ३३ कम्पनीहरू जुन लुब्रिकेन्ट, टायर, ब्याट्री, ग्यारेज उपकरण र अन्य अटो कम्पोनेन्टहरूमा विशेषज्ञ छन् । शोमा ९५ प्रदर्शकहरू सहभागी हुनेछन् भने १३० वटा स्टलहरू रहने बताइएको छ ।

आर्थिक चुनौतीहरूका बीचमा अटोमोबाइल क्षेत्रलाई पुनर्जीवित गर्दै यस अटो शोको आयोजना गर्न गइरहेको बरालले बताए ।

यस्तै, अटो शोले उद्योगलाई पुनर्जीवित गर्न राष्ट्रिय अर्थतन्त्रमा महत्त्वपूर्ण भूमिका खेल्ने नाडाका अध्यक्ष करण चौधरीले जानकारी दिए । ‘यस शोले आर्थिक गतिविधिलाई बढावा दिने छैन, चुनौतीपूर्ण वातावरणको बाबजुद प्रदर्शनीले कम्पनीहरूको तर्फबाट उत्साहजनक सहभागिता प्राप्त गरेको छ, जसले उद्योगभित्रको बलियो आशावाद र लचिलोपनको संकेत गर्दछ,’ अध्यक्ष चौधरीले भने ।

चाडपर्वको मौसम नजिकिँदै गर्दा नाडा अटो शोबाट नयाँ मोडेलहरू प्रविधिहरू र प्रवृित विकल्पहरू र व्यावसायिक अवसरहरूको पनि लाभ लिन सक्नेछन् ।

प्रदर्शनीलाई चारपांग्रे, दुईपांग्रे, हल्का व्यावसायिक सवारी साधन, अटो कम्पोनेन्ट र वित्तीय संस्थाहरूमा विभाजन गरिएको बताइएको छ । यसले सबै आगन्तुकहरूका लागि एक सुविधाजनक र प्रभावकारी अनुभव सुनिश्चित गर्ने नाडाले जानकारी दिए । अटो शोको प्रवेशको लागि अग्रिम रूपमा टिकट खल्ती एपमार्फत खरिद गर्न सकिने नाडाले बताएको छ ।

अग्रिम टिकट खरिदकर्ताहरूले अगस्ट २६ सम्मको टिकट खरिदमा २० प्रतिशत क्यासब्याक लाभ उठाउन सक्ने बताइएको छ । अटो शो अवधिभर करिव ७५ हजार अवलोकनकर्ता आउने अपेक्षा नाडाले लिएको छ ।

नाडा अटो शो २०२४ मा टाटा ईभी मुख्य प्रायोजक र शिखर इन्स्योरेन्स कम्पनी लिमिटेड सह–प्रायोजकको रूपमा छन् । अटो शोले अर्थतन्त्रलाई महत्त्वपूर्ण रूपमा वृद्धि गर्न मञ्चको तयार पर्ने अध्यक्ष चौधरीले बताए । नाडाले अटो शो अवधिभर पार्किङ साथै सुरक्षाको व्यवस्थापन गरेको छ । उक्त शो अवधिमा काठमाडौं भ्यूटावर, धरहरालगायतका स्थानमा पार्किङ गर्न सकिने छ ।