नयाँ होन्डा सीजीएक्स १५० सार्वजनिक, अफ-रोडिङ सुविधाले सुसज्जित

होन्डाले विश्व बजारमा लन्च गर्नुअघि आफ्नो आगामी बाइक सीजीएक्स १५० का केही तस्बिर सार्वजनिक गरेको छ । बाइकलाई पूर्णतया रेट्रो लुकमा डिजाइन गरिएको छ । यो पूर्ण रूपमा चीनको वुयाङ होन्डा कारखानामा निर्मित छ । यसका ३ वटा भेरिएन्ट विश्व बजारमा बिक्रीका लागि ल्याइनेछ ।

आगामी होन्डा सीजीएक्स १५० बाइक सीजी १२५ मा आधारित छ । यसमा १४९ सीसी इन्जिन प्रयोग गरिएको छ । यसमा जडान गरिएको एयर कुल्ड, फोर-स्ट्रोक, सिंगल सिलिन्डर युनिटले १२ एचपी पावर जनरेट गर्नेछ । बाइकको इन्जिन ५ स्पिड गियरबक्ससँग जोडिएको छ । यसको टप स्पिड ९८ किलोमिटर प्रति घण्टा हुने अनुमान गरिएको छ । कम्पनीले यसको १२५ सीसी मोडल पनि पछि ल्याउन सक्ने बताइएको छ ।

बाइकको सस्पेन्सनको लागि अगाडि टेलिस्कोपिक फोर्क र पछाडि ड्युअल रियर सक एब्जर्बर रहेको छ । बाइकमा थोरै उठेको एक्जस्ट दिइएको छ । बाइकको वजन १२८ किलोग्राम छ ।

होन्डा सीजीएक्स १५० मा गोलाकार हेडल्याम्प, राउन्ड आकारको रियर-भ्यु मिरर, फोर्क गेटर, कर्भी फ्युल ट्याङ्की र मिनिमल बडी प्यानलिङ दिइएको छ । यसका साथै क्याफे रेसर भेरिएन्टमा बार एन्ड ड्युअल टोन मिरर, रेड शेडमा फ्रेम र पछाडि हम्प भएको राइडर ओन्ली सिट रहेको छ ।

होन्डाले सीजीएक्स १५० यस वर्ष सेप्टेम्बरमा चीनमा लन्च गर्नेछ । चीनमा यसको प्रारम्भिक मूल्य लगभग १० हजार युआन हुने अनुमान गरिएको छ ।