बाइक अचानक रोक्नु परेमा पहिले ब्रेक थिच्ने कि क्लच ?

अधिकांश मानिसहरू यात्रा र अफिस जानको लागि दैनिक बाइक प्रयोग गर्छन् । बाइकबाट यात्रा किफायती हुन्छ र ट्राफिकमा फस्नबाट बच्न पनि मद्दत गर्छ । तर, वर्षौँसम्म बाइक चलाएर पनि कतिपय मानिसहरू केही कुरामा अलमलमा परेको हुन्छ । जस्तै बाइक रोक्नु परेमा कसरी ब्रेक लगाउने, कहिले क्लच थिच्ने वा कुन ब्रेक र क्लच पहिले थिच्ने जस्ता कुराहरूमा । यी कुरामा ध्यान नदिँदा दुर्घटनाको जोखिम बढ्न सक्छ । विभिन्न परिस्थिति अनुसार बाइकको ब्रेक र क्लच कसरी प्रयोग गर्ने भनेर बुझ्नु जरुरी छ ।

पहिलो अवस्थामा
बाइक चलाउँदा एक्कासि ब्रेक लगाउनु परेमा क्लच र ब्रेक एकैसाथ थिच्न सकिन्छ । आपत्कालीन अवस्थामा, क्लच र ब्रेक सँगै प्रयोग गरिन्छ । यो बाइकको कुनै पनि मेकानिकल भागलाई नोक्सान नगरी ब्रेक लगाउने उत्तम तरिका हो । तर, अचानक ब्रेक लाग्ने जस्ता अवस्थामा पनि सावधानी अपनाउनुपर्छ ।

दोस्रो अवस्थामा
यदि बाइक तीव्र गतिमा छ र अचानक बाइक रोक्न वा स्लो गर्नु परेमा पहिले ब्रेक लगाउनु उचित हुन्छ । त्यसपछि बाइकको क्लच थिचेर तल्लो गियरमा सिफ्ट गर्नुपर्छ। यस्तो गरिएन भने बाइक बन्द हुन्छ ।

तेस्रो अवस्थामा
सामान्य गतिमा बाइक चलाउँदा केही समयको लागि बाइक स्लो गर्नु परेमा थोरै ब्रेक लगाउँदा पनि हुन्छ । यसको लागि क्लच थिच्नु पर्दैन । यो अवस्था विशेष गरी केही सानातिना अवरोध पार गर्नु पर्दा आएको हुन्छ ।

चौथो अवस्थामा
बाइक कम स्पिडमा छ र ब्रेक लगाउनु परेमा पहिले क्लच थिच्नु पर्छ र त्यसपछि ब्रेक थिच्नु पर्छ । किनभने यस्तो अवस्‍थामा पहिले ब्रेक लगाएमा बाइक रोकिने सम्भावना हुन्छ । पहिलो वा दोस्रो गियरमा जाँदा यो गर्न सकिन्छ ।