भिनफास्टले भारतमा इलेक्ट्रिक कार उत्पादन गर्ने, पहिलो कार सन् २०२५ मा

भियतनामको इलेक्ट्रिक कार निर्माता कम्पनी भिनफास्टले भारतमा इलेक्ट्रिक कार प्रोडक्शन र बिक्री गर्ने योजना बनाएको छ । यसको लागि कम्पनीले तमिलनाडुमा प्लान्ट स्थापना गर्दैछ ।

यसअघि कम्पनीले भारतमा इम्पोर्टेड ईभी मात्र बेच्ने गरेको थियो तर अब यो योजना परिवर्तन गरिएको छ । भिनफास्टलाई टेस्लाको ठुलो प्रतिद्वन्द्वीको रूपमा हेरिन्छ । भिनफास्ट तमिलनाडुमा प्लान्टमा प्रोडक्शन मार्च २०२५ देखि सुरु हुने अपेक्षा गरिएको छ।

रिपोर्टका अनुसार भिनफास्टले भारतमा एसेम्बल गरिएको पहिलो कारको बिक्री २०२५ को फेस्टिभ सिजनमा सुरु हुन सक्छ । यसको मूल्य २५ देखि ३० लाख भारु हुने अनुमान गरिएको छ । सो कारले एक पटक चार्जमा ३००–५०० किलोमिटरको दुरी तय गर्न सक्ने बताइएको छ ।

भिनफास्टले पहिलो वर्षमा नै भारतमा ५० हजार कार उत्पादन गर्ने कम्पनीको अपेक्षा छ । कम्पनीका अनुसार भारतमा यस वर्ष इलेक्ट्रिक कारको बजार १ लाख ५० हजार युनिट हुनेछ जुन अघिल्लो वर्ष ९० हजार युनिट थियो । कम्पनीले अर्को वर्ष भारत मोबिलिटी ग्लोबल एक्सपोमा भारतमा आफ्ना थप योजनाको रोडम्याप प्रस्तुत गर्नेछ ।