प्रदेश जान थाले छपाई भएका स्मार्ट लाइसेन्स, यसरी खोजी गर्न सकिन्छ लाइसेन्सको स्थिति

काठमाडौं – यातायात व्यवस्था विभागले छपाई गरेका सवारी चालक अनुमति पत्र (स्मार्ट लाइसेन्स) प्रदेशमा वितरणका लागि पठाउन थालेको छ ।

विभागले सुदूर पश्चिम र कर्णाली प्रदेशका यातायात कार्यालयहरुमा कार्ड पठाएको हो । यातायात कार्यालय महाकाली, सेती, डोटी, डडेलधुरा, सुर्खेत, जुम्ला र चौरजहारीमा ती कार्ड पठाइएको जानकारी विभागले दिएको छ ।

यद्यपि ती स्थानका पनि सबै कार्ड भने पठाइएका छैनन् । क्रमशः अन्य प्रदेशमा पनि यस्ता कार्ड पठाइने विभागको भनाइ छ ।

आफ्नो कार्डको अवस्था के छ भनेर थाहा पाउनका लागि यातायात व्यवस्था विभागको वेबसाइट प्रयोग गर्न सकिन्छ ।

यसका लागि वेबसाइट खोलेर त्यसको दायाँ साइडमा रहेको सवारी चालक अनुमति पत्र (स्मार्ट कार्ड) प्रिन्ट स्थितिमा रहेको खाली ठाउँमा आफ्नो ड्राइभिङ लाइसेन्स नम्बर राखेर ‘अवस्था जाँच गर्नुहोस्’ मा क्लिक गरेमा लाइसेन्सको अवस्था थाहा पाउन सकिन्छ ।