काठमाडौंमा देखियो बीवाईडीको प्रिमियम एसयुभी याङवाङ यू८, यस्तो छ चिनियाँ पर्यटकले ल्याएको कार

काठमाडौं– प्रिमियम एसयूभी याङवाङ यू८ काठमाडौंस्थित बीवाइडी शोरुममा देखिएको छ । बीवाइडीको सब–ब्राण्ड याङवाङ नामले बिक्री हुँदै आएको यू८ फुल साइज लक्जरी एसयूभी हो । चिनियाँ पर्यटकले नेपाल ल्याएको यो नयाँ कार प्लग–इन–हाइब्रिड सिस्टमको हो । यू८ लाई बीवाईडीले सन् २०२३ को जनवरीमा लन्च गरेको थियो ।

५ वटा ढोका भएको यू८ लाई कम्पनीले ई४ प्लेटफर्मममा तयार पारेको हो । बीवाईडी आँफैले विकास गरेको २.० लिटर टर्वो पेट्रोल इन्जिन जडान गरिएको यो शक्तिशाली एसयूभीमा २२० किलोवाट आवर क्षमताको इलेक्ट्रिक मोटर जडान गरिएको छ । जसको संयुक्त पावर १ हजार १९६ पिएस र टर्क १ हजार २८० एनएम छ । यू८ लाई प्रतिघण्टा २०० किलोमिटरको गतिमा हाँक्न सकिन्छ । यसमा अल ह्विल ड्राइभ सिस्टम दिइएको छ ।

याङवाङ यू८ मा ४९.०५ किलोवाट आवरको एलएफपी ब्याट्री जडान गरिएको छ । जसको इलेक्ट्रिक रेन्ज १८० किलोमिटर र संयुक्त रेन्ज १ हजार किलोमिटर दावी गरिएको छ । एसयूभीको लम्बाई ५ हजार ३१९ एमएम, चौडाई २ हजार ५० एमएम र उचाई १ ९३० एमएम तथा ह्विलवेश ३ हजार ५० एमएम छ । यसलाई पानीको सतहमाथी ३ किलोमिटर प्रतिघण्टाको गतिमा ३० मिनेटसम्म चलाउन सकिन्छ ।

एसयुभीको ड्यासबोर्डमा २३.६ इन्चको इन्स्ट्रयुमेन्ट प्यानल, १२.८ इन्चको भर्टिकल इन्फोटेन्मेन्ट सिस्टम र अगाडी वस्ने प्यासेन्जरका लागी अर्को २३.६ इन्चको इन्फोटेन्मेन्ट स्क्रिन दिइएको छ । साथै, यसमा अर्को ७० इन्चको हेड–अप–डिस्प्ले समेत राखिएको छ ।

कारमा तीनवटा वायरलेस चार्जर, थर्मोग्राफिक क्यामेरा र स्याटेलाइट फोनको सुविधा समेत दिइएको छ । सुरक्षाका लागि यसमा लेभल–२ एड्भान्स ड्राइभर एसिस्टेन्स सिस्टम उपलब्ध छ । कारमा १३ वटा क्यामेरा, १२ वटा अल्ट्रा सोनिक राडर र ५ वटा मिलिमिटर वेभ राडार राखिएको छ ।