अब मूल्य बढ्ने पालो टाटा टियागो ईभीको, दियो यस्तो संकेत

काठमाडौं – नेपाली बजारमा टाटाका कार बिक्री–वितरण गरिरहेको सिप्रदी ट्रेडिङ प्रालिले टियागो ईभीको मूल्य बढाउने संकेत गरेको छ । कम्पनीले सामाजिक सञ्जालमा यस सम्बन्धी पोस्ट सार्वजनिक गर्दै पहिलेकै मूल्यमा सवारी साधन किन्नका लागि जानकारी प्रदान गरेको छ ।

हाल बजेटले समेत इलेक्ट्रिक कारको करमा वृद्धि गरेको छ । बजेटले ५० किलोवाट भन्दा तलको मोटर पावर भएको ईभीमा ५ प्रतिशत भन्सार र ५ प्रतिशत अन्तःशुल्क वृद्धि गरेको छ । यस अनुसार अब भन्सार १५ प्रतिशत र अन्तःशुल्क ५ प्रतिशत तिर्नु पर्छ ।

पहिले ५० किलोवाटसम्मको गाडीमा १० प्रतिशत भन्सार शुल्क लाग्ने गरेकोमा त्यसलाई बढाएर १५ प्रतिशत पुर्याइएको छ । अन्तःशुल्कमा पहिले नै छुट थियो । अहिले यसलाई ५ प्रतिशतले बढाइएको छ । यस अनुसार यो सेगमेन्टका गाडीमा समग्रमा १० प्रतिशत कर बढाइएको छ । यसले गर्दा पनि यी गाडीको मूल्यमा वृद्धि हुने अनुमान गर्न सकिन्छ ।

हाल नेपाली बजारमा एक्सटी, एक्सजेड प्लस र एक्सजेड प्लस टेक लक्स गरी तीन भेरिएन्ट बिक्रीका लागि उपलब्ध छन् । यी गाडीको मूल्य क्रमशः २६ लाख ४९ हजार, २७ लाख ९९ हजार र २८ लाख ९९ हजार रुपैयाँ पुगेको छ । लङ रेन्ज भेरिएन्टको टियागो ईभीमा २४ किलोवाट आवरको ब्याट्री र ४९ किलोवाटको मोटर छ ।

अत्याधुनिक जिपट्रोन प्रविधियुक्त टियागो ईभीका पाँच वटा प्रमुख बिशेषताहरु कार्य कुशलता, प्रविधि, विश्वसनियता, चार्जिङ र आरामदायिता रहेका छन् । अत्याधुनिक टेलिम्याटिक्स, कन्ट्रयास्ट रुफ, पूर्ण स्वचालित क्लाइमेट कन्ट्रोल, प्रोजेक्टर अटो हेडल्याम्प जस्ता विशेषताहरु यसमा रहेका छन्।