एक्सचेन्जमा जोड दिदै ईभी बिक्रेता, धमाधम पुराना गाडीसँग नयाँ इलेक्ट्रिक गाडी साटिदै

नयाँ इलेक्ट्रिक गाडी नेपाली बजारमा धमाधम भित्रिरहेका छन् । यसबाट नेपाली ग्राहकहरु इलेक्ट्रिक गाडीतिर आकर्षित भएको अनुमान गर्न सकिन्छ ।

यही मेसोमा हाल इलेक्ट्रिक गाडी बिक्रेताहरुले पुराना पेट्रोलियम गाडी चढ्ने ग्राहकलाई समेत इलेक्ट्रिक गाडीतिर आकर्षित गर्न खोजिरहेका छन् । उनीहरुले यसका लागि धमाधम एक्सचेन्ज क्याम्प चलाउन थालेका छन् ।

बीवाईडीको नेपालका लागि आधिकारिक वितरक साइमेक्स इंकले ‘अपग्रेड टु बीवाईडी’ क्याम्पेनको घोषणा गरेको छ । सवारी धनीहरुलाई आफ्नो सवारी साधन एक्सचेन्ज र अपग्रेड गरी पछिल्लो समयमा नेपाल भित्रिएका बीवाईडी इलेक्ट्रिक भेइकल प्रयोग गर्नका लागि यो उपयुक्त अवसर हुनेछ ।

सो इभेन्ट गत बिहीबार देखि काठमाडौं उपत्यकाका विभिन्न स्थानमा चलिरहेको छ । सो अवसरमा हाल भइरहेको गाडीसँग नयाँ बीवाईडी गाडी साट्ने ग्राहकले एक्सचेन्ज बोनसको रुपमा २ लाख रुपैयाँ सम्म प्राप्त गर्नेछन् । साइमेक्सले यसरी गाडी लिन चाहने ग्राहकहरुलाई प्रतिस्पर्धी ब्याजदरमा बैंकमार्फत ८० प्रतिशत सम्मको फाइनान्स सुविधा समेत उपलब्ध गराउने व्यवस्था गर्ने बताएको छ ।

नेपालका लागि सेरेस ईभीको आधिकारिक वितरक एमएडब्लु वृद्धिले सेरेस लिमिटलेस एक्सचेन्ज क्याम्पको घोषणा गरेको छ । नेपालभरका आधिकारिक डिलर तथा आफ्नै शोरुममा प्रारम्भ भएको सो एक्सचेन्ज क्याम्प आगामी मंगलबार सम्म चल्ने छ ।

सो स्पेसल इभेन्टमा ग्राहकले अभूतवपूर्व फाइदाका साथ अल्टिमेट इलेक्ट्रिक एसयूभीमा अपग्रेड हुने अपूर्व अवसर प्राप्त गर्नेछन् ।

सेरेस लिमिटलेस एक्सचेन्ज क्याम्पमा ग्राहकले अन द स्पट कार भ्यालुएसन, बेस्ट एक्सचेन्ज रेट, एक्सचेन्ज बोनस र इजी फाइनान्सिङ अप्सन जस्ता फाइदा लिन सक्ने छन् ।

अन द स्पट कार भ्यालुएसन अन्तर्गत ग्राहकले आफ्नो अहिलेको कारको भ्यालुएसन तुरुन्तै गराउन सक्ने छन् । त्यसैगरी आफ्नो कारको सके सम्म बढी मूल्य अर्थात बेस्ट एक्सचेन्ज रेट पाउन सकिने छ भने पुरानो कारसँग नयाँ सेरेस कार एक्सचेन्ज गर्ने भएकाले एक्सचेन्ज बोनसको रुपमा थप रकम प्राप्त गर्न सक्ने छन् ।

त्यसैगरी सेरेसका लागि आवश्यक रकम नपुगेको अवस्थामा सहज तरिकाले फाइनान्स सुविधाको समेत व्यवस्था हुने बताइएको छ ।

नेपालका लागि टाटा मोटर्सको अधिकारिक वितरक सिप्रदी ट्रेडिङ प्रालिले टाटा मोटर्स एक्सचेन्ज कार्यक्रम आयोजना गर्न लागेको छ ।

क्याम्पमा जुनसुकै ब्रान्डका पुराना गाडीहरुसँग टाटाको नेपालमा सर्वाधिक रुचाइएका टाटा नेक्सन म्याक्स र टियागो लगायतका विद्युतीय गाडीहरु साट्न सकिनेछ । ग्राहकवर्गको परिवर्तित जीवनशैली र अत्याधुनिक सवारीहरुप्रतिको रुचि तथा चाहनालाई मध्यनजर गर्दै टाटा मोटर्सको शोरुम थापाथली लगायत देशैभरी रहेका शोरुमहरुमा एक्सचेन्ज कार्यक्रम आयोजना गर्न लागिएको कम्पनीको भनाइ छ ।

एक्सचेन्ज कार्यक्रममा विद्युतीय गाडीका लागि निःशुल्क फास्ट चार्जर, १ वर्षको अटोप्लस इन्स्योरेन्स, १ वर्षको सवारी कर, एसेसरिज तथा एक्सचेन्ज बोनस लगायतका आकर्षक उपहारहरु रहेका छन् ।

यस कार्यक्रममा ग्राहकहरुले टाटा मोटर्सको नयाँ तथा अत्याधुनिक डिजाइनका उत्पादनहरु अवलोकन तथा टेष्ट ड्राइभ गर्न सक्नेछन् । यस कार्यक्रममा सहभागी भई नयाँ टाटाका विद्युतीय गाडीहरु खरिद गरेर भरपुर फाइदा उठाउन कम्पनीले आग्रह गरेको छ ।

आगामी बजेट पश्चात विद्युतीय गाडीको मूल्यमा वृद्धि हुने हल्ला समेतलाई मध्यनजर गरी कम्पनीले मूल्य परिवर्तन हुनु भन्दा पहिले नै फाइदा लिन सकिने संकेत समेत गरेको छ ।

अन्य कम्पनीहरुले पनि बजेट पश्चात मूल्यमा केही परिवर्तन हुन सक्ने सम्भावनालाई मध्यनजर गरी यस्तो कार्यक्रम ल्याएको अनुमान गर्न सकिन्छ । बजेट आगामी जेठ १५ गते सार्वजनिक हुँदैछ ।

ेओमोडाको नेपालका लागि आधिकारिक वितरक एसपीजी अटोमोबाइलले जेठ १४ गतेसम्म ओमोडा ई५ किन्दा २ लाख ५० हजारसम्म नगद छुट दिने स्किम नै ल्याएको छ । बजेट अघि ओमोडा ई५ किन्ने ग्राहकले २ लाख ५० हजार फाइदा पाउने भएका छन् ।

४ महिना अघि औपचारिक लन्च हुँदा यो इलेक्ट्रिक एसयूभीको मुल्य ५९ लाख ४९ हजार रुपैयाँ निर्धारण गरिएको थियो । पछि उक्त मूल्यमा २ लाख ५० हजार बृद्धि गरेर ६१ लाख ९९ हजार पुर्याइएको ई५ लाई ग्राहकले पुरानै मूल्यमा खरिद गर्ने अवसर पाएका हुन् ।