पल्सर एन १५० को बिक्री सुरु हुँदै, के–के छन् विशेषता ?

काठमाडौं– पल्सर सिरिज अन्तर्गतको नयाँ मोडल एन१५० नेपाल आउने भएको छ । बजाज मोटरसाइकलको नेपालका लागि आधिकारिक वितरक हंसराज हुलासचन्द एण्ड कम्पनीले अवको केही साताभित्र सो नयाँ मोटरसाइकल लन्च गर्ने तयारी गरेको हो ।

भारतिय बजारमा लन्च भएर केही समयपछि बन्द भएको पी १५० मोडलमा आधारित सो नयाँ मोटरसाइकलमा थुप्रै नयाँ फिचर दिइएको छ । इन्जिन पी १५० कै भएपनि यसको ग्राफिक्स भने एन १६० बाट लिइएको छ ।

सो नयाँ मोटरसाइकलमा बजाजले १४९.६८ सिसी क्षमताको बिएस६ इन्जिन जडान गरेको छ । उक्त ईन्जिनले अधिकतम १४.५ पिएस पावर र १३.५ एनएम टर्क जेनेरेट गर्दछ ।

एयर कुल्ड सिस्टम दिइएको मोटरसाइकललाई सेल्फ र किक दुबै तरिकाले स्टार्ट गर्न सकिन्छ । ५–स्पिड गियर वक्स भएको एन १५० लाई ११५ किलोमिटर प्रतिघण्टाको उच्च गतिमा हाँक्न सकिने दावी छ ।

नेकेड स्पोर्ट सेग्मेन्टको सो नयाँ मोटरसाइकलमा सिंगल च्यानल एबिएस, एलइडी डिआरएलएस सहितको प्रोजेक्टर हेडल्याम्प, ट्विन एलइडी टेल ल्याम्प, नयाँ डिजिटल इन्स्ट्रयुमेन्ट क्लस्टर, यूएसवी चार्जर, अन्डर बेली एक्जस्ट, सिंगल पीस ह्यान्डलबार, सिंगल पिस सिट सेटअप र टेलिस्कोपिक एण्ड फर्क सस्पेन्सन लगायत फिचर उपलब्ध छ ।

यो नयाँ मोटरसाइकलले प्रति लिटर पेट्रोलको खपतमा ४५ किलोमिटर माइलेज दिने दावी गरिएको छ । साथै यसको ग्राउन्ड क्लिरियन्स १६५ एमएम र सिट हाईट ७९० एमएम छ ।