९ महिनामा अटो लोनको ब्याजदरमा व्यापक कमी, यस्तो छ नविल र वाणिज्य बैंकको दर

महिनाको अन्त्यतिर बैंकहरुले अर्को महिनाका लागि अन्यका साथै अटो लोनका लागि समेत ब्याजदर सार्वजनिक गर्ने गर्छन् । अहिले पनि धेरै बैंकहरुले सो दर सार्वजनिक गरेका छन् ।

पछिल्लो समयमा गाडी किन्नका लागि बैंकहरुले उपलब्ध गराउने ब्याजदरमा पनि निकै नै कमी आएको छ । बजारमा धेरै गाडी बिक्री नभएको चर्चा भइरहेको समयमा गाडी किन्नका लागि बैंकहरुले उपलब्ध गराउने अटो लोनको ब्याजदर भने निकै नै घटेको पाइन्छ ।

हामीले गत वर्षको भदौ महिनाका लागि बैंकहरुले उपलब्ध गराएको अटो लोन र अहिले जेठ महिनाका लागि उपलब्ध गराएको अटो लोनका सन्दर्भमा देशमा प्रमुख दुुई ठूला बैंक राष्ट्रिय वाणिज्य बैंक र नविल बैंकले उपलब्ध गराउने अटो लोनको तुुलनात्मक अध्ययन गरेका छौ । यो अध्ययनबाट पनि बैंकहरुले उपलब्ध गराउने लोनमा धेरै फरक पाइन्छ ।

हाल बैंकहरुले कर्जा स्थिर हुने र परिवर्तन हुने गरी दुई प्रकारले अटो लोन दिने गरेको पाइन्छ । त्यसैगरी निजी र कमर्सियल सवारी साधनका लागि पनि छुट्टाछुट्टै ब्याज दर लिने गरेका छन् भने विद्युतीय सवारी साधनका लागि कम ब्याजदरमै अटो लोन उपलब्ध गराउछन् ।

धेरै बैंकहरुले आफ्नो बेस रेट र त्यसमा थप गरेर ब्याज दर तोक्ने गरेका छन् भने स्थिर ब्याज दरमा भने निश्चित प्रतिशत नै ब्याज दर तोक्ने गरेका छन् ।

राष्ट्रिय वाणिज्य बैंकले यसरी गाडी कर्जा प्रदान गर्दा जेठ महिनाका लागि बेस रेटमा ३.५० र विद्युतीय सवारी साधन कर्जामा २.२५ प्रतिशत सम्म थप गरेर ब्याज लिने दर सार्वजनिक गरेको छ । हाल बैंकको बेस रेट ८.०२ प्रतिशत छ । यसका आधारमा बैंकले गाडी कर्जाका लागि ११.५२ प्रतिशत सम्म ब्याज लिनेछ भने विद्युतीय सवारी साधनका लागि १०.२७ प्रतिशत सम्म लिनेछ । त्यसैगरी स्थिर ब्याज दर अन्तर्गत ७ वर्ष सम्मका लागि १३.५० र १२.२५ प्रतिशत दर तोकेको छ ।

यसरी गाडी कर्जा प्रदान गर्दा बेस रेटमा २.५० र विद्युतीय सवारी साधन कर्जामा ५ वर्ष सम्मका लागि १.२५ र ५ वर्ष देखि ७ वर्ष सम्मका लागि १.४५ प्रतिशत थप गरेर ब्याज लिने दर सार्वजनिक गरेको छ । हाल बैंकको बेस रेट ७.४२ प्रतिशत छ । यसका आधारमा बैंकले गाडी कर्जाका लागि ९.९२ प्रतिशत सम्म ब्याज लिनेछ भने विद्युतीय सवारी साधनका लागि ८.८७ प्रतिशत सम्म लिनेछ । त्यसैगरी स्थिर ब्याज दर अन्तर्गत ७ वर्ष सम्मका लागि ११.५० र ९.५० प्रतिशत दर तोकेको छ ।

नविल बैंकले पहिले प्राइभेट, कमर्सियल र इलेक्ट्रिक भेइकल भनी तीन वर्गमा सबैलाई बेस रेटमा ५ प्रतिशत जोडेर ब्याज लिने गरेकोमा अब भने प्राइभेटमा २ देखि ४ र कमर्सियलमा ३ देखि ४ प्रतिशत सम्म लिने सार्वजनिक गरेको छ भने इलेक्ट्रिक तर्फ प्राइभेटलाई १ देखि ३ र कमर्सियललाई ३ देखि ४ प्रतिशत ब्याजदर सार्वजनिक गरेको छ । बेस रेट पहिले ९.५२ प्रतिशत भएकोमा अब भने ८.३६ प्रतिशत मात्र रहेको छ । यस अनुसार ब्याजदर १२.३६ प्रतिशत सम्म हुनेछ, जबकी पहिले यो १४.५२ प्रतिशत सम्म थियो ।

पहिले ५ वर्ष सम्मका लागि १३.४९ प्रतिशत र ५ देखि ७ वर्ष सम्मका लागि १४.४९ प्रतिशत स्थिर ब्याजदर निर्धारण भएकोमा अब भने क्रमशः ९.९९ प्रतिशत र १०.४९ प्रतिशत रहेको छ ।

यसैगरी अन्य बैंकहरुले समेत निकालेको ब्याज दर हेर्दा सामान्यतः १० प्रतिशतको हाराहारीमा अटो लोन उपलब्ध हुनेछ ।