ब्याट्री, मोटर र कन्ट्रोलरमा लाइफ टाइम वारेन्टी सहित वुलिङको नयाँ ईभी लन्च

इन्डोनेसियामा चलिरहेको पेरिकलिन्डा इलेक्ट्रिक भेइकल शो (पीईभीएस) मा वुुलिङ क्लाउड ईभी लन्च भएको छ । वुलिङले हाल विश्व बजारमा उपलब्ध गराइरहेको वुलिङ एयर मिनी ईभी र वुलिङ बिंगो सिटी कार पछिको यो तेस्रो ईभी हो । यसको मूल्य ४१० मिलियन इन्डोनेसियन डलर अर्थात करिव ३२ लाख रुपैयाँ तोकिएको छ ।

यो गाडीको ब्याट्री, इलेक्ट्रिक मोटर र कन्ट्रोलरमा लाइफ टाइम वारेन्टी उपलब्ध गराइएको छ । त्यसैगरी ७ किलोवाटको चार्जर र मर्मत सुविधा जस्ता विभिन्न सुविधा समेत उपलब्ध छ ।

पीईभीएसमा उपलब्ध टप पाँच डायमन्ड ब्रान्ड मध्ये वुलिङ क्लाउड सबैभन्दा बढी अर्डर गरिएको सवारी साधन हो । अन्य मोडलको तुलनामा यो ६७ प्रतिशत बढी अर्डर भएको दावी गरिएको छ ।

वुलिङ क्लाउड सिंगल भेरिएन्टमा उपलब्ध छ । यसको फ्रन्ट एक्सलमा १३६ पीएसको इलेक्ट्रिक मोटर रहेको छ । यसमा भएको ५०.६ किलोवाट आवरको लिथियम आइरन फस्फेट ब्याट्रीले सिंगल चार्जमा ४६० किलोमिटरको रेन्ज दिने बताइएको छ ।

यसमा पावर्ड टेलगेट, १३५ डिग्री ब्याकरेस्ट रिक्लाइन सहितको फ्रन्ट सिट, वायरलेस चार्जर, रियर एसी, ३६० डिग्री क्यामेरा र एडेप्टिभ क्रुज कन्ट्रोल, लेन डिपार्चर वार्निङ र एईबी सहितको एडास फिचर रहेको छ ।

इन्डोनेसियामा बेस्ट सेलिङ बीईभी अर्थात ब्याट्री इलेक्ट्रिक भेइकल ब्रान्डको रुपमा वुलिङ लोकप्रिय छ । सन् २०२४ को पहिलो क्वाटरमा यसको ६४ प्रतिशत बजार हिस्सा भएको दावी गरिएको छ ।

नेपालमा समेत वुलिङ ब्रान्डका ईभी बिक्रीका लागि उपलब्ध छन् । वुलिङ एयर ईभी बज्र गु्रुप अन्तर्गतको ईभी नेपाल मोटर्सले बिक्री–वितरण गरिरहेको छ भने वुलिङ बिंगो पारामाउन्ट मोटर्सले बिक्री–वितरण् गर्ने गरी सम्झौता भएको सार्वजनिक भएको थियो र हाल विवादित अवस्थामा छ ।

भविष्यमा वुलिङ क्लाउड ईभी समेत नेपाली बजारमा बिक्रीका लागि उपलब्ध हुने अुनमान गर्न सकिन्छ ।