भारत प्रवेश गर्ने योजनामा लिप मोटर, नेपालमा टी–०३ छिट्टै लन्च हुने

चिनियाँ ईभी निर्माता लिप मोटरले भारत प्रवेश गर्ने योजना बनाएको छ । मिडिया रिपोर्टका अनुसार कम्पनीले आगामी हप्तामा आफ्नो लगानी योजना घोषणा गर्ने तयारी गरेको छ ।

लिप मोटरले स्टेलान्टिस समूहसँगको साझेदारीमा आफ्नो ईभी भारतमा ल्याउने योजना बनाएको हो । दुई कम्पनीले आगामी केही हप्तामा आफ्नो भारत योजनाहरू घोषणा गर्ने तयारी गरेको मिडिया रिपोर्टमा उल्लेख छ । यदि यो प्रस्तावलाई सरकारले अनुमोदन गरेमा, यसले लिप मोटरको बजेट इलेक्ट्रिक कारहरू भारतमा लन्च गर्न मार्ग प्रशस्त गर्नेछ ।

लिप मोटरसंग हाल सी–०१ मोडलको सेडान, सी–११ एसयूभी र टी–०३ ह्याचब्याक सहित तीनवटा मोडल उपलब्ध छ । जसमध्ये टी–०३ नेपाल आउने तयारीमा छ ।

नेपाल आउने टी–०३ मा ३६.५ किलोवाट आवर क्षमताको ब्याट्री जडान गरिएको छ भने मोटर क्षमता ५५ र ८० किलोवाट हुनेछ । एमएडब्लु ग्रुप अन्तर्गतको बाणिज्य विकास कम्पनीले हाल यसको परिक्षण गरिरहेको छ ।

कम्पनीले यसको मूल्य २५ र २८ लाख निर्धारण गरिसकेको छ । कारले सिंगल चार्जमा २८० किलोमिटर रेन्ज दिने दावी गरिएको छ ।