रोयल इन्फिल्ड पोकर रन पोखरा प्रस्थान, धुमधामका साथ मनाइदै नयाँ वर्ष

काठमाडौं – रोयल इन्फिल्ड राइडरहरु सहभागी पोकर रन पोखरातिर प्रस्थान गरेको छ । विहान एक कार्यक्रमका बिच नेपाल पर्यटन बोर्डका कार्यकारी सीईओ नन्दिनी लाहे थापा र रोयल इन्फिल्डको नेपालका लागि आधिकारिक वितरक अल्फा अटोमोटिभका डाइरेक्टर मेघराज पौडेल लगायतले पोकर रनका राइडरहरुलाई विदाई गरे ।

रोयल इन्फिल्ड पोकर रन नेपाललाई स्याक्रेड समिट्सले आयोजना गरेको हो भने यसमा अल्फा अटोमोटिभको मुख्य प्रायोजन रहेको छ । नेपाल पर्यटन बोर्ड, नेपाल पर्यटन बोर्ड पोखरा र पोखरा पर्यटन परिषदको संबद्धता तथा रेड बुल इनर्जी ड्रिंक, डाबर नेपाल रियल जुस र कवच राइडिङ गियरको सह–प्रायोजन र अन्य धेरैको साथ सहयोग रहेको छ ।

करिव २०० किलोमिटरको दुरी पार गरी पोखरा पुगेर लेकसाइडस्थित होटल ल्यान्डमार्कमा त्यो रातको बास, गाँस र चास अर्थात मधुशाला, पार्टी र मनोरञ्जनको व्यवस्था हुनेछ ।

सो कार्यक्रमको अर्को रमाइलो पक्ष भनेको पोकर खेल हो । पोकर भन्नाले ताससँग सम्बन्धित एक किसिमको खेललाई बुझाउछ । पोकर खेलमा पाँच पत्ति तास हातमा लिएर अनेकौ दाउ बनाउन सकिन्छ । पोकर रनमा पनि प्रत्येक सहभागीलाई विभिन्न पाँच ठाउँमा एकएक पत्ति तास तान्ने मौका प्रदान गरिन्छ । अन्तिममा पोखरा पुगेर उक्त पाँच पत्ति तास मिलाउदा जसको दाउ सबैभन्दा ठुलो हुन्छ, त्यो नै त्यस कार्यक्रमको विजेता मानिन्छ र उसलाई विभिन्न कम्पनीद्वारा प्रायोजित विशेष उपहार प्रदान गरिन्छ । कार्यक्रमकै अंश अनुरुप लाइभ कन्सर्ट, डिजे सेसन लगायतका कार्यक्रम गरी सहभागीलाई भरपुर मनोरञ्जन प्रदान गरिन्छ ।

कार्यक्रममा सहभागीहरुलाई विभिन्न प्रकारका रोचक पुरस्कारको समेत व्यवस्था गरिने छ । यसमा बेस्ट पोकर ह्यान्ड, बेस्ड इन्फिल्ड अवार्ड, सपोर्टिङ वुमन राइडर, सिनियर सिटिजन अवार्ड, लङ डिस्टेन्स राइडर र यात्रा अवधिभर धेरै दुःख दिने मोटरसाइकललाई हार्ड लक अवार्ड प्रदान गरिने छ ।

बैशाख १ गतेका दिन सबै सहभागीहरु पोखराको संघ अन्नपूर्ण बाल गृहमा गएर विभिन्न शैक्षिक सामग्री हस्तान्तरण गर्ने कार्यक्रम छ ।

यस पटक १०० भन्दा बढी बाइक राइडरहरु कार्यक्रममा सहभागी भएका छन् ।