नयाँ डर्ट बाइक ल्याउदै अप्रिलिया, वेबसाइटमा सूचीबद्ध, चाँडै लन्च हुने संकेत

आरएस ४५७ को लन्च पछि अप्रिलियाले भारतीय बजारमा अप्रिलिया टुआरेग ६६० बाइक लन्च गर्ने तयारी गर्दैछ । अप्रिलिया टुआरेग ६६० कम्पनीको भारतीय वेबसाइटमा सूचीबद्ध भइसकेको छ, जसमा सबै जानकारी दिइएको छ । यद्यपि कम्पनीले अहिलेसम्म यसको लन्च मिति भने सार्वजनिक गरेको छैन ।

टुआरेग ६६० दुई वर्षभन्दा बढी समयदेखि विश्वव्यापी रूपमा बिक्री भइरहेको छ । यो एक एड्भेन्चर बाइक हो । यसमा पावरको लागि ६५९ सीसी लिक्विड कुल्ड प्यारेलल ट्विन इन्जिन जडान गरिएको छ । सो इन्जिनले ७९ बीएचपीको पावर र ७० एनएमको टर्क जेनेरेट गर्छ । यसमा ट्रान्समिशनको लागि ६ स्पिड गियरबक्स दिइएको छ ।

टुआरेग ६६० तीन रङमा उपलब्ध हुनेछ । सो बाइक एड्भेन्चर टुरर भएकोले यसको फ्रन्टमा ठूलो विन्डस्क्रिन, स्पोक रिम्स, ठूलो इन्धन ट्यांकी र फ्ल्याट सिटका साथ अपस्वेप्ट एक्जस्ट दिइएको छ । बाइकको सिट हाईट ८६० एमएम र ग्राउन्ड क्लियरेन्स २४० एमएम छ ।

बाइकमा फिचरको रुपमा ४ राइडिङ मोड, स्विच गर्न मिल्ने एबीएस, ट्रयाक्सन कन्ट्रोल र अप्रिलिया परफर्मेन्स राइड कन्ट्रोल दिइएको छ । यसमा राइडर असिस्ट इलेक्ट्रोनिक्सको सिरिज समावेश छ ।

सो बाइकमा डर्ट बाइक जस्तो स्टाइल दिइएको छ । जसमा बुमेराङ आकारको सिंगल पिस सिट र लामो अपस्वेप्ट एक्जस्ट छ । सो बाइकको तौल १८७ किलोग्राम र इन्धन ट्यांकीको क्षमता १८ लिटर छ ।

सस्पेन्सनका लागि बाइकमा फ्रन्टमा कायाबा यूएसडी र रियरमा कायाबा मोनोशक युनिट दिइएको छ । बाइकको फ्रन्टमा २१ इन्चको स्पोक ह्विल र पछाडि १८ इन्चको स्पोक ह्विल रहेको छ । यसको मूल्य करिब १० लाख भारु हुने अनुमान गरिएको छ ।