अब सिट्रोनको नयाँ गाडी हुनेछ बेसाल्ट, सार्वजनिक भयो कन्सेप्ट

सिट्रोनले भारतमा नयाँ कूपे एसयूभीको कन्सेप्ट मोडल सार्वजनिक गरेको छ । कम्पनीले सो गाडीलाई ’बेसाल्ट भिजन कूपे एसयूभी’ भनेको छ र यसको उत्पादन भारतमा हुनेछ ।

सिट्रोन बेसाल्ट सी–क्यूब प्रोग्राम अन्तर्गत उपलब्ध हुने कम्पनीको तेस्रो गाडी हुनेछ, जस अन्तर्गत सिट्रोनले पहिले नै सी३ र सी३ एयरक्रस उपलब्ध गराइसकेको छ ।

यो प्रोग्राम विशेष गरी भारत र दक्षिण अमेरिकी बजारका लागि तयार गरिएको छ, जसको उद्देश्य विकसित र किफायती मोडल पेश गर्नु हो ।

सिट्रोन बेसाल्ट नामको यो प्रसिद्ध गाडीलाई भारतीय बजारमा यस वर्षको सेकेन्ड हाफ सम्म ल्याउने योजना छ। त्यसपछि साउथ अमेरिकी बजारमा प्रस्तुत गरिनेछ। यसको मुल्य ८ लाख भारु देखि प्रारम्भ हुन सक्ने अनुमान गर्न सकिन्छ । नेपालमा पनि त्यसपछि नै उपलब्ध हुने अनुमान गर्न सकिन्छ ।

यस सेग्मेन्टमा सिट्रोनको सो एसयूभीले टाटाको कूपे एसयूभी कर्र्भसँग प्रतिस्पर्धा गर्न सक्छ । यद्यपि मूल्य अनुसार भने यो सँग प्रतिस्पर्धा गर्न सक्ने अन्य कारहरु हुन्डाई क्रेटा, किया सेल्टोस, फक्सवागन टाइगुन, मारुती ग्रान्ड भिटारा, टोयोटा हाइराइडर, स्कोडा कुशाक र होंन्डा एलिभेट हुन सक्छन् ।

नयाँ कूपे बेसाल्ट एसयूभी सीएमपी प्लेटफर्ममा विकसित गरिएको छ । यो भन्दा पहिले सी३ र सी३ एयरक्रस समेत यही प्लेटफर्ममा बनेका छन् । गाडीको लुक पनि सी३ र सी३ एयरक्रसबाट प्रेरित छ। यसको अगाडि क्रोम फिनिस भएको स्प्लिट ग्रिल र स्प्लिट हेडल्याम्प छ। यहाँ प्रोजेक्टर हेडल्याम्पहरू हुनेछ। तलको भागमा, एयर भेन्टको चौकोर डिजाइन इलिमेन्ट एयरक्रसबाट लिइएको छ।

साइड प्रोफाइल बाहेक यहाँ स्लोपिङ रूफलाइन, स्क्वायर ह्विल आर्क, साइड बडी क्लेडिङ र डुअल–टोन अलोय ह्विल्स दिइएको छ। यसकारण गाडी स्पोर्टी देखिन्छ। एसयूभीलाई कुपे स्टाइल प्रदान गर्नका लागि पछाडिको प्रोफाइल उच्च पारिएको छ र यसमा बुट लिडलाई थोरै उच्च देखाइएको छ। यसमा राउन्ड एलईडी टेललाइट र सिल्भर स्किड प्लेटसहित उच्च बम्पर पनि दिइएको छ।

सिट्रोनले बेसाल्ट भिजन कन्सेप्ट मोडलको इन्टेरियर सार्वजनिक गरेको छैन। यसको इन्टेरियर सी३ एयरक्रस जस्तै हुने अनुमान गरिएको छ । कम्पनीका अन्य गाडीहरुको तुलनामा यसमा धेरै फिचर हुने अनुमान गरिएको छ । यसमा क्रूज कन्ट्रोल, अटोमेटिक एसी, पुश बटन स्टार्ट/स्टप र किलेस इन्ट्री जस्ता फिचर्स दिन सकिने अनुमान छ ।

त्यसैगरी यसमा १०.२ इन्च टचस्क्रिन र ७ इन्च डिजिटल ड्राइभर डिस्प्ले समावेश छ । सुरक्षाका लागि गाडीमा ६ एयरब्याग, इलेक्ट्रोनिक स्टेबिलिटी कन्ट्रोल, पछाडिको पार्किङ क्यामेरा र टायर प्रेसर मोनिटरिङ सिस्टम जस्ता फिचर्स दिइएको हुन सक्छ।

सिट्रोन बेसाल्ट भिजन कुपेमा परफर्मेन्सका लागि सी३ ह्याचब्याक र सी३ एयरक्रसको १.२ लिटर टर्बो पेट्रोल इन्जिन दिइएको हुन सक्छ, जसले ११० पीएस पावर र २०५ एनएम टर्क जेनेरेट गर्छ । इन्जिनका साथ ६–स्पिड म्यानुअल र ६–स्पिड अटोमेटिक गियरबक्स दिन सकिने छ ।