सुजुकीको पहिलो इलेक्ट्रिक एसयूभीमा हुनेछन् यस्ता फिचर, थप जानकारी सार्वजनिक

मारुती सुजुकीले चाँडै नै आफ्नो पहिलो इलेक्ट्रिक एसयूभी ईभीएक्स लन्च गर्दैछ । सो एसयूभी लन्च हुनुअघि परीक्षणको समयमा देखा परेको छ । साथै यसको फिचरको बारेमा पनि केही जानकारी सार्वजनिक भएको छ ।

रिपोर्टका अनुसार सो एसयूभी पाँच सिटको इलेक्ट्रिक एसयूभी हुनेछ र यसको फ्रन्ट फेन्डरमा चार्जिङ पोर्ट जडान गरिएको छ । जबकि पछाडिको ढोकाको ह्यान्डल पिलरमा दिइएको छ ।

सो एसयूभीमा ३६० डिग्री क्यामेरा, एडीएएस, इन्टिग्रेटेड स्पोइलर, एलईडी लाइट, हाई माउन्टेड स्टप ल्याम्प, शार्क फिन एन्टेना, डिजिटल कन्सोल, हेड अप डिस्प्ले, वायरलेस चार्जर, ड्युअल जोन अटोमेटिक क्लाइमेट कन्ट्रोल, एम्बियन्ट लाइट जस्ता फिचर समावेश गरिएको छ ।

सो इलेक्ट्रिक एसयूभीको रेन्जको बारेमा कम्पनीले यसअघि नै जानकारी दिइसकेको छ । कम्पनीका अनुसार यो एसयूभी फुल चार्ज गरेपछि ५५० किलोमिटरसम्म चल्न सक्छ । यसमा ६० किलोवाट क्षमताको ब्याट्री प्याक उपलब्ध गराइनेछ ।

मारुती सुजुकीले पहिलो इलेक्ट्रिक एसयूभीको कन्सेप्ट भर्सन सन् २०२३ को अटो एक्स्पोमा सार्वजनिक गरेको थियो । यसपछि कम्पनीले फ्रेबुअरी २०२४ मा आयोजित भारत मोबिलिटी इभेन्टमा पनि सो एसयूभी सार्वजनिक गरेको थियो ।