विद्युतीय कारमा ब्याजदर कम र कर्जा रकम पनि बढी, यस्तो छ बैंकको नयाँ ब्याजदर

विद्युतीय सवारी किन्नका लागि विभिन्न बैंकहरुले दिने अटो कर्जाको ब्याजदर पेट्रोलियम पदार्थबाट चल्ने सवारीका लागि उपलब्ध हुने ब्याजदर भन्दा कम हुन्छ । अधिकांश बैंकहरुले हालै प्रकाशित गरेको ब्याजदरमा यो तथ्य स्पष्ट देखिएको छ ।

पहिले देखि नै विद्युतीय सवारीका लागि कर्जा उपलब्ध गराउनमा अग्रणी देखिएको एनएमबी बैंकले इलेक्ट्रिक सवारीका लागि व्यक्तिगत तर्फ बेस रेट भन्दा ०.५ देखि २.५ प्रतिशत बढी ब्याजदर लिने बताएको छ भने कमर्सियल तर्फ २ देखि ४ प्रतिशत बढी लिने बताएको छ । जबकी यो दर आईसीई भेइकल तर्फ क्रमशः २ देखि ४ प्रतिशत र २.५ देखि ४.५ प्रतिशत छ ।

बैंकले इलेक्ट्रिक सवारीका लागि एनएमबी सुलभ अटो लोन अन्तर्गत ५ वर्षका लागि १०.१० प्रतिशत र ७ वर्षका लागि १०.४९ प्रतिशत ब्याजदर तोकेको छ ।

राष्ट्रिय वाणिज्य बैंकले उपलब्ध गराउने गाडी कर्जा अन्तर्गत ७ वर्ष सम्मका लागि १२.५० प्रतिशत ब्याजदर छ भने विद्युतीय सवारी साधन कर्जाका लागि १०.५० प्रतिशत ब्याजदर छ ।

त्यसैगरी संस्थागत आवधिक कर्जाका लागि भने स्थिर ब्याजदर अन्तर्गत ५ देखि १० वर्ष सम्मका लागि १२.५० र १० वर्ष भन्दा बढी अवधिको लागि १३.५० प्रतिशत छ ।

स्ट्यान्डर्ड चार्टर्ड बैंकले बेस रेटमा ३.५ प्रतिशत सम्म थपेर अटो लोन दिने बताएको छ । यसको बेस रेट ९.२२ प्रतिशत छ । त्यसैगरी फिक्स्ड रेट अन्तर्गत ५ वर्षका लागि ११.५० प्रतिशत र ५ वर्ष भन्दा बढी समयका लागि १२ प्रतिशत तोकिएको छ ।

इलेक्ट्रिक सवारीका लागि भने स्ट्यान्डर्ड चार्टर्डले १०.७४ प्रतिशत मात्र ब्याजदर तोकेको छ र महिलाका लागि झन् १०.४९ प्रतिशत मात्र तोकेको छ ।

एभरेष्ट बैंकले भेइकल लोन भनेर फिक्स्डमा ११.९९ प्रतिशत ब्याजदर तोकेको छ भने फ्लोटिङ रेट अन्तर्गत बेस रेटमा १.५० देखि ३.५० प्रतिशत सम्म थपिने बताएको छ । एभरेष्टको बेस रेट ८.७१ प्रतिशत छ ।

बैंकहरुले चैत देखि लागु हुने नयाँ ब्याजदर सार्वजनिक गरेका छन् । यस अनुसार इलेक्ट्रिक सवारी साधनतर्फ कम मात्र ब्याजदर तोकिएको छ ।

इलेक्ट्रिक सवारी साधनका लागि बैंकहरुले सवारी साधनको मूल्यको ८० प्रतिशत सम्म कर्जा प्रवाह गर्न सक्ने व्यवस्था छ ।