एक्सयूभी३०० को फेसलिफ्ट भर्सन लन्च गर्ने तयारीमा महिन्द्रा

कम्प्याक्ट एसयूभीको लोकप्रियताका कारण कम्पनीहरूले आफ्ना प्रोडक्टहरु अपडेट गरिरहेका छन् । रिपोर्टका अनुसार महिन्द्राले एक्सयूभी३०० को फेसलिफ्ट भेरिएन्ट चाँडै लन्च गर्ने तयारी गरिरहेको छ । कम्पनीले आगामी आर्थिक वर्षको पहिलो त्रैमासिकमा सो एसयूभीको नयाँ भर्सन भारतीय बजारमा ल्याउने तयारी गरिरहेको छ । कम्पनीले सो एसयूभीको पुरानो भेरिएन्टको बुकिङ पनि बन्द गरिसकेको छ ।

कम्पनीले फेसलिफ्ट भेरिएन्टको मिड–लाइफ पनि अपडेट गरेको छ । महिन्द्राको सब फोर मिटर एसयूभीको फेसलिफ्ट भर्सनमा नयाँ डिजाइन गरिएका बम्पर, लाइट र अलोय ह्विलका साथै इन्टेरियरमा नयाँ ड्यासबोर्ड, इन्स्ट्रयुमेन्ट क्लस्टर, थप सुविधासहितको इन्फोटेनमेन्ट सिस्टम र एडीएएस जस्ता सेफ्टी फिचर पनि दिन सक्ने अनुमान गरिएको छ । तर, एसयूभीको इन्जिन र ट्रान्समिसनमा भने कुनै परिवर्तन हुने छैन ।

कम्पनीले हाल नयाँ एसयूभीको बारेमा कुनै जानकारी दिएको छैन । यद्यपि सो एसयूभीको फेसलिफ्ट भर्सन परीक्षणको क्रममा देखिएको छ । फेसलिफ्ट भेरिएन्टको मूल्य हालको भेरिएन्टभन्दा ५० देखि ७० हजार भारु बढी हुने अनुमान गरिएको छ ।