भारतमा लन्च भयो बीवाईडी सिल इलेक्ट्रिक सेडान

संसारकै सबैभन्दा ठूलो इलेक्ट्रिक कार निर्माता कम्पनी बीवाईडीले भारतमा इलेक्ट्रिक सेडान ‘सिल’ लन्च गरेको छ । भारतीय बजारमा तीन भेरिएन्टमा सो सेडान उपलब्ध गराइएको छ ।

यसको बेस भेरिएन्ट डाइनामिकले सिंगल चार्जमा ५१० किलोमिटरको रेन्ज दिन्छ र यसको मूल्य ४१ लाख भारु तोकिएको छ । त्यसैगरी मिड स्पेक भेरिएन्ट प्रिमियमले ६५० किलोमिटरको रेन्ज दिन्छ र यसको मूल्य ४५ लाख ५० हजार भारु तोकिएको छ भने टप पर्फमेन्स भेरिएन्टले ५८० किलोमिटरको रेन्ज दिन्छ र यसको मूल्य ५३ लाख भारु तोकिएको छ ।

बीवाईडी सिल मोड्युलर ई–प्लेटफर्म ३.० मा आधारित छ र यसमा ८०० भोल्ट इलेक्ट्रिक आर्किटेक्चर दिइएको छ । इन्डियन स्पेक्सको सिलमा प्रिमियम र परफर्मेन्स भेरिएन्टका लागि बीवाईडीको ब्लेड एलएफपी ब्याट्रीका साथ ८२.५६ किलोवाट आवर ब्याट्री प्याक दिइएको छ भने डाइनामिक भेरिएन्टमा सानो ६१.४४ किलोवाट आवरको प्याक छ ।

बीवाईडी सिलको ब्याट्री प्याकमा १५० किलोवाट सम्मको स्पिड सम्म डीसी फास्ट चार्जिङ सपोर्ट दिइएको छ । यसले ३७ मिनेटमै १० देखि ८० प्रतिशत सम्म चार्ज गर्न सक्छ । त्यसैगरी ११ किलोवाट अनबोर्ड एसी चार्जरले ८.६ घण्टामा फुल चार्ज गर्न सक्छ ।

बीवाईडी सिलको डिजाइन धेरै हद सम्म ओसन–एक्स कन्सेप्टबाट प्रभावित छ । यसको फ्रन्टमा स्प्लिट लाइटिङ डिजाइन दिइएको छ भने फ्रन्ट बम्परको तल्लो भागमा चार एलईडी डीआरएल्स उपलब्ध छ ।

सेफ्टीको मामिलामा सो गाडीलाई युरो एनक्यापबाट फाइभ स्टार सेफ्टी रेटिङ प्राप्त भएको छ । यसमा एडास टेक्नोलोजी पनि उपलब्ध छ । त्यसैगरी यसमा ड्राइभ सेलेक्टर, ड्राइभिङ मोड स्क्रोल ह्विल र ड्युअल वायरलेस चार्जर जस्ता फिचर उपलब्ध छन् ।

नेपाली बजारमा भने बीवाईडी सिल पहिले नै लन्च भइसकेको छ ।