बीवाईडीले ब्लेड ब्याट्रीसहित एट्टो २ मिनी इलेक्ट्रिक एसयूभी ल्याउने

चिनियाँ इलेक्ट्रिक कार निर्माता कम्पनी बीवाईडीले चाँडै नै भारतीय र केही समय पश्चात नेपाली बजारमा समेत नयाँ इलेक्ट्रिक कार लन्च गर्ने तयारी गरिरहेको छ । हालै कम्पनीले चिनिया बजारमा एट्टो २ मिनी इलेक्ट्रिक एसयूभी लन्च गरेको थियो । नयाँ इलेक्ट्रिक एसयूभी बीवाईडीको थर्ड जेनेरेसन ३.० इलेक्ट्रिक कार प्लेटफर्ममा आधारित छ, जसमा फ्रन्ट ह्विल ड्राइभ लेआउटसहित उपलब्ध छ ।

बीवाईडी एट्टो २ इलेक्ट्रिक एसयूभी २०२५ सम्म युरोपेली बजारमा बिक्रीको लागि उपलब्ध हुनेछ । सो एसयूभी भारतीय बजारमा पनि लन्च गर्ने सम्भावना छ । सो सेगमेन्टमा यो एसयूभीले आगामी मारुती सुजुकी ईभीएक्स, हुन्डाई क्रेटा ईभी, टाटा कर्भ र टाटा नेक्सन ईभीसँग प्रतिस्पर्धा गर्नेछ ।

बीवाईडी एट्टो २ मा ब्लेड ब्याट्री जडान गरिएको छ । यसमा फास्ट चार्जिङ र फायर प्रुफ टेक्नोलोजी उपलब्ध छ । यसमा ३२ किलोवाट वा ४५.१ किलोवाट ब्याट्री प्याक जडान गरिएको छ, जसले क्रमशः ३०० किलोमिटर र ४०० किलोमिटरसम्मको रेन्ज प्रदान गर्छ । यसको तौल १४३० किलोग्रामदेखि १५४० किलोग्रामसम्म छ ।

रिपोर्टका अनुसार नयाँ एट्टो २ को लम्बाइ ४३१० एमएम, चौडाइ १८३० एमएम र उचाई १६७५ एमएम छ । सो एसयूभीले ९४ बीएचपीको पावर वा १७४ बीएचपीको पावर जेनेरेट गर्छ । सो इलेक्ट्रिक कारको ब्याट्रीमा फास्ट चार्जिङको सुविधा पनि रहेको छ ।