३ लाख ५ हजारसम्म घटेर फेरी आयो मिटिओर ३५० नेपाल, यस्तो छ नयाँ मूल्य

काठमाडौं– रोयल इन्फिल्डको नेपालका लागि आधिकारिक वितरक अल्फा अटोमोटिभ प्रालिले मिटिओर ३५० को बिक्री सुरु गरेको छ । नयाँ बिक्रेताका रुपमा नियुक्त भएपछि नेपालमै एसेम्वल प्लान्ट खोलेर कारोबार थालेको कम्पनीले भारी मूल्य कम गरेर यो मोटरसाइकल नेपालमा फेरी बिक्री सुरु गरेको हो ।

यसअघि अल्फा अटोमोटिभले ८ लाख ७० हजारसम्म मूल्य निर्धारण गरेर बिक्री गरेको सो मोटरसाइकललाई हाल भने ३ लाख ५ हजारसम्म मूल्य कम गरेर ५ लाख ६५ हजारसम्ममै बिक्री सुरु गरेको हो । मिटिओर ३५० फायरवल, स्टेलर र सुपरनोभा गरी कुल तीन भेरिएन्टमा उपलब्ध छ ।

जसको नयाँ मूल्य क्रमशः ५ लाख ५० हजार, ५ लाख ५५ हजार र ५ लाख ६५ हजार निर्धारण गरिएको छ । कम्पनीले यसलाई नेपालमै एसेम्वल गरी उत्पादन गरेको हो । यसअघि कम्पनीले यसलाई क्रमशः ८ लाख ३० हजार, ८ लाख ५० हजार र ८ लाख ७० हजार रुपैयाँ तोकेको थियो ।

कम्पनीको जे–प्लेटफर्मममा निर्माण गरिएको मिटिओर ३५० मा ३४९ सिसी सिंगल सिलिन्डर, फ्यूल इन्जेक्टेड फोर स्ट्रोक इन्जिन जडान गरिएको छ । सो इन्जिनको अधिकतम पावर २०.२ बिएचपी र टर्क २७ एनएम रहेको छ । यसको दुबै चक्कामा डिस्क ब्रेक जडान गरिएको छ ।

ईजी क्रुजिङ डिजाइनमा तयार परिएको यो मोटरसाइकलमा १५ लिटर क्षमताको फ्यूल ट्यांक, १४० एमएम लामो ह्विलवेश र ७६५ एमएम उचाइको सिट पाउन सकिन्छ । यो खैरो, निलो र रातो रङमा उपलब्ध रहेको छ । कम्पनीका अनुसार देशभर संचालनमा रहेका रोयल इन्फिल्ड शोरुममा गएर ग्राहकले यसको बुकिङ लिन सक्नेछन् ।