ओलाले एक वर्षमै बिक्री गर्यो २ लाख ५० हजार बढी स्कुटर

भारतको प्रख्यात इलेक्ट्रिक टु–ह्विलर निर्माता ओलाले बिक्रीमा नयाँ माइलस्टोन हासिल गरेको छ । कम्पनीले जनवरी १ देखि डिसेम्बर २३, २०२३ सम्म २ लाख ५२ हजार ६४७ युनिट बिक्री गरेको हो ।

यससंगै ओला इलेक्ट्रिक भारतमा एक वर्षमा २.५ लाख युनिटको अंक पार गर्ने पहिलो विद्युतीय २ पाङ्ग्रे ब्रान्ड बनेको छ । टिभिएसले दोस्रो सबैभन्दा बढी १ लाख ६२ हजार ३९९ युनिट बिक्री गरेको छ भने एथर इनर्जीले १ लाख १ हजार ९४० युनिट बिक्री गर्दै तेस्रो स्थानमा पर्न सफल भएको छ ।

ओलाले औषतमा प्रति महिना २० हजार हाराहारी स्कुटर बिक्री गरेको कम्पनीले जनाएको छ । कम्पनीले नोभेम्बरमा सबैभन्दा धेरै २९ हजार ८९८ युनिट बिक्री गरेको थियो । कम्पनीको बजार हिस्सा ३०.५० प्रतिशत छ भने टिभिएस र एथरको क्रमशः १९.६० र १२.३० प्रतिशत छ ।

ओलाले हाल भारतमा ९० हजारदेखि १ लाख ४७ हजार भारुसम्मको ई–स्कुटर उपलब्ध गराउँदै आएको छ । कम्पनीको फ्ल्यागशिप मोडल एस१ प्रो भेरियन्टले सिंगल चार्जमा १९५ किलोमिटर रेन्ज दिने दावी गरिएको छ । सो स्कुटरमा ५ किलोवाट क्षमताको मोटर र ४ किलोवाट आवरको ब्याट्री प्याक जडान गरिएको छ ।

ओलालाई नेपाली बजारमा सिजी मोटर्सले कारोबार गर्ने सहमती भएपनि हालसम्म औपचारिक बिक्री भने प्रारम्भ भइसकेको छैन ।