हन्टर ३५० को खरिदमा १५ हजारको एसेसरिज निःशुल्क

काठमाडौं– रोयल इन्फिल्डको सस्तो मोटरसाइकल हन्टर ३५० खरिद गर्दा १५ हजार बरावरको एसेसरिज निःशुल्क पाइने भएको छ । रोयल इन्फिल्डको नेपालका लागि आधिकारिक वितरक अल्फा अटोमोटिभ प्रालिले नयाँ बर्ष २०२४ को अवसर पारेर ल्याएको अफर अन्तर्गत ग्राहकले सो सुविधा पाउने भएका हुन् । अफर नक्साल, बालकुमारी र टेकुस्थित कम्पनीको आफ्नै शोरुममा मात्र लागुहुने जनाइएको छ ।

नेपालमै एसेम्वल गरिएको हन्टर रेट्रो र मेट्रो गरी दुईवटा भेरिएन्टमा उपलब्ध छ । जसको मूल्य क्रमशः ४ लाख ५९ हजार र ४ लाख ७९ हजार रुपैयाँ तोकिएको छ । जुन रोयल इन्फिल्डको प्रोडक्ट पोर्टफोलियोमा सवैभन्दा सस्तो हो ।

रोयल इन्फिल्डको जे–प्लेटफर्ममा निर्माण गरिएको यो नयाँ बाइकमा ३४९ सीसी क्षमताको सिंगल–सिलिन्डर इन्जिन छ । यो इन्जिनले २०.२ एचपी पावरका साथ २७ एनएमको टर्क जनेरेट गर्ने सामाथ्र्य राख्छ ।

रोयल इन्फिल्डको लोकप्रिय मोडल क्लासिक ३५० भन्दा १७ किलो कम वजन भएको यसको ह्विलवेश पनि २० एमएम सानो छ । सिटको उचाइ ८०० एमएम, ह्यान्डल बार, ट्युबलेस टायर र डुअल च्यानल एविएस सहित दुवै चक्कामा डिस्क ब्रेक जस्ता फिचर यसमा पाउन सकिन्छ ।