फागुनमा हुँदैछ नेपाल राइडर्स मिट, छिट्टै रजिष्ट्रेसन खुल्दै

काठमाडौं – मोरङ जिल्लाको लेटाङ नजिक आयोजना गर्ने तयारी भइरहेको नेपाल राइडर्स मिटको रजिष्ट्रेसन छिट्टै खुल्दै छ । फ्रेन्ड्स अफ रोयल इन्फिल्ड अर्थात फोरे नेपालले आयोजना गर्ने सो राइडर्स मिटको तयारी भइरहेको आयोजकको भनाइ छ ।

आगामी मार्च ८ देखि १० अर्थात फागुन २५ देखि २७ गते सम्म सो मिट हुँदैछ । यस पटक राइडर्स मिटको छैटौं संस्करण हो । सो कार्यक्रमलाई रोयल इन्फिल्ड मोटरसाइकल र कवच गियरले प्रायोजन गरेका छन् ।

मोटरसाइकल संस्कृति र लाइफस्टाइलमार्फत स्थानीय पर्यटनलाई समेत प्रवद्र्धन गर्ने उद्देश्यले उनीहरु यस प्रकारको इभेन्ट आयोजना गर्छन् । फोरे नेपाल अन्तर्गत रहेका नेपालभरका विभिन्न इन्फिल्ड क्लबहरु यसको आयोजक हुने गर्छन् ।

राइडर्स मिटको अवसरमा लाइभ ब्यान्ड, स्लो र डर्ट बाइक रेस, सांस्कृतिक कार्यक्रम लगायतका विभिन्न मनोरञ्जनात्मक कार्यक्रम गरिने छ । २ रात र ३ दिनको कार्यक्रमका लागि टेन्ट गाडेर सबै मनोरञ्जनको व्यवस्था गरिने छ । राइडरहरुलाई नयाँपनको अनुभव दिनका लागि पनि यस प्रकारको राइडर्स मिट आयोजना गरिने प्रचलन रहेको फोरे नेपालका अध्यक्ष सुनिल मानन्धर डायमन्डले बताए ।